शहादा, दि. २१ :
शहादा शहरात स्वातंत्र्यवीर विनायक दामोदर सावरकर यांच्या प्रेरणादायी जीवनकार्यावर आधारित भव्य व्याख्यान सोहळ्याचे आयोजन करण्यात आले आहे. सकल हिंदू समाजाच्या वतीने आयोजित या कार्यक्रमात महाराष्ट्रातील प्रसिद्ध सिने अभिनेते आणि प्रगल्भ वक्ते शरदजी पोंक्षे प्रमुख व्याख्याते म्हणून उपस्थित राहणार आहेत.
“स्वातंत्र्यवीर सावरकर आणि हिंदू राष्ट्र” या विषयावर शरद पोंक्षे आपल्या ओजस्वी शैलीतून मार्गदर्शन करणार असून, सावरकरांचा इतिहास, त्याग, राष्ट्रभक्ती आणि विचार यांचा परिचय नागरिकांना होणार आहे.
हा व्याख्यान सोहळा शुक्रवार, दि. २२ मे रोजी सायंकाळी ७:३० वाजता डोंगर रोडवरील कै. नरोत्तम सजन मैदान, पटेल रेसिडेन्सी समोर, शहादा येथे आयोजित करण्यात आला आहे.
आजच्या तरुण पिढीपर्यंत स्वातंत्र्यवीर सावरकरांचे विचार आणि कार्य पोहोचावे या उद्देशाने या कार्यक्रमाचे आयोजन करण्यात आले असल्याचे आयोजकांनी सांगितले. या विचारप्रवर्तक व्याख्यानासाठी शहादा शहर व परिसरातील नागरिक, युवक-युवती तसेच माता-भगिनींनी मोठ्या संख्येने उपस्थित राहावे, असे आवाहन करण्यात आले आहे.
व्याख्यानानंतर सर्व उपस्थितांसाठी भोजनाची व्यवस्था करण्यात आली असून, या कार्यक्रमास उपस्थित राहण्याचे आवाहन आयोजक अजय शर्मा व राजा साळी यांनी केले आहे.
