शहादा | प्रतिनिधी
शहरातील प्रभाग क्रमांक १२ मधील संभाजीनगर कॉलनी परिसरात गेल्या ८ ते १० वर्षांपासून नागरिकांच्या सुरक्षिततेसाठी धोकादायक ठरत असलेल्या लोंबकळणाऱ्या विद्युत तारा अखेर सुरक्षित करण्यात आल्या आहेत. महावितरण विभाग आणि स्थानिक लोकप्रतिनिधींच्या सातत्यपूर्ण पाठपुराव्यानंतर अतिरिक्त विद्युत खांब उभारण्यात आल्याने परिसरातील नागरिकांनी सुटकेचा श्वास सोडला आहे.
संभाजीनगर कॉलनीतील श्री. बोरदेकर यांच्या घरासमोरील विद्युत खांबावरील तारा अत्यंत खाली झुकलेल्या अवस्थेत होत्या. पावसाळा आणि वादळी वाऱ्याच्या काळात या तारांमुळे मोठा अपघात होण्याची भीती निर्माण झाली होती. परिसरातील लहान मुले, ज्येष्ठ नागरिक आणि रहिवाशांच्या जीवितास धोका निर्माण झाल्याने नागरिकांमध्ये चिंतेचे वातावरण होते.
या गंभीर समस्येबाबत स्थानिक नागरिकांनी भाजप शहराध्यक्ष तथा नवनिर्वाचित नगरसेवक ज्ञानेश्वरभाऊ चौधरी, नगरसेविका सौ. भावना चंद्रभान कदम आणि डॉ. चंद्रभान कदम यांच्याकडे निवेदनाद्वारे समस्या मांडली. यानंतर संबंधित लोकप्रतिनिधींनी महावितरणचे शहर अभियंता पुष्पेंद्र पाडवी यांच्याशी संपर्क साधून सातत्याने पाठपुरावा केला.
या प्रयत्नांना अखेर यश मिळाले असून महावितरण विभागाने या ठिकाणी अतिरिक्त नवीन विद्युत खांब उभारला. गुरुवारी नवीन खांबावर विद्युत तारा सुरक्षितपणे वर ओढून बसवण्यात आल्या. हे काम सुरू असताना ‘श्री शिवछत्रपती ग्रुप’चे प्रमुख विजुभाऊ चौधरी आणि डॉ. चंद्रभान कदम यांनी स्वतः घटनास्थळी उपस्थित राहून कामाची पाहणी केली व संबंधित कर्मचाऱ्यांना आवश्यक सूचना दिल्या.
गेल्या अनेक वर्षांपासून प्रलंबित असलेला हा प्रश्न सुटल्याने संभाजीनगर कॉलनीतील रहिवाशांनी समाधान व्यक्त केले आहे. नागरिकांनी ज्ञानेश्वरभाऊ चौधरी, सौ. भावना कदम, डॉ. चंद्रभान कदम, विजुभाऊ चौधरी आणि अभियंता पुष्पेंद्र पाडवी यांचे आभार मानले असून लोकप्रतिनिधींनी दाखवलेल्या तत्परतेचे कौतुक केले आहे.
