दोडामार्ग/प्रतिनिधी
दोडामार्ग तालुक्यात उभारण्यात आलेल्या ‘महालक्ष्मी विद्युत प्रकल्पा’ची वीज सध्या तालुक्यालाच मिळत नसून ती दुसऱ्या राज्याला पुरवली जात असल्याचा धक्कादायक प्रकार समोर आला आहे. महावितरण आणि प्रकल्प प्रशासन यांच्यातील करार संपून तब्बल तीन वर्षे उलटूनही तो अद्याप पूर्ववत न झाल्याने आगामी पावसाळ्यात संपूर्ण दोडामार्ग तालुका अंधारात जाण्याची भीती व्यक्त केली जात आहे. “धरण उशाला आणि कोरड घशाला” अशीच परिस्थिती सध्या दोडामार्गवासीयांची झाली आहे.
सध्या दोडामार्ग तालुक्यातील सासोली सबस्टेशनला ३३ केव्ही इन्सुली लाईनवरून वीजपुरवठा केला जातो. मात्र ही लाईन अत्यंत कुचकामी ठरत असून साधा वारा, पाऊस किंवा विजांचा कडकडाट झाला तरी लाईन तत्काळ ट्रिप होते. परिणामी संपूर्ण तालुक्याला तासनतास अंधाराचा सामना करावा लागतो. विशेषतः पावसाळ्यात ही समस्या अधिक गंभीर बनते.
यापूर्वी महालक्ष्मी विद्युत प्रकल्पातून दोडामार्ग तालुक्याला सुरळीत वीजपुरवठा केला जात होता. मात्र महावितरण आणि प्रकल्प प्रशासनातील करार संपुष्टात आल्यानंतर गेली तीन वर्षे हा प्रश्न रखडलेलाच आहे. प्रशासकीय पातळीवर कोणतीही ठोस हालचाल न झाल्याने स्थानिक नागरिकांमध्ये तीव्र नाराजी व्यक्त होत आहे. स्वतःच्या तालुक्यात प्रकल्प असूनही येथील नागरिकांना विजेपासून वंचित राहावे लागत असून, इथली वीज मात्र दुसऱ्या राज्याला विकली जात असल्याचा आरोप नागरिकांकडून केला जात आहे.
दरम्यान, वीजपुरवठा खंडित झाल्यानंतर आपत्कालीन परिस्थितीत महालक्ष्मी प्रकल्पातून तात्पुरता वीजपुरवठा देण्याचे संबंधित अधिकाऱ्यांनी पूर्वी मान्य केले होते. मात्र प्रत्यक्षात तालुक्यात अंधार पडल्यानंतर संबंधित अधिकारी मोबाईल ‘स्विच ऑफ’ करून ठेवतात किंवा उडवाउडवीची उत्तरे देत असल्याचा आरोप नागरिकांनी केला आहे. अधिकाऱ्यांच्या या बेजबाबदार कारभारामुळे संतापाचे वातावरण निर्माण झाले आहे.
पावसाळा तोंडावर असताना वारंवार खंडित होणाऱ्या वीजपुरवठ्यामुळे जनजीवन विस्कळीत होण्याची शक्यता आहे. त्यामुळे दोडामार्गचे तहसीलदार, प्रशासन आणि स्थानिक लोकप्रतिनिधींनी तातडीने लक्ष घालून महावितरण आणि महालक्ष्मी प्रकल्प प्रशासनाची संयुक्त बैठक घेऊन वीज करार पूर्ववत करावा, अशी जोरदार मागणी नागरिकांकडून होत आहे. अन्यथा ऐन पावसाळ्यात दोडामार्ग तालुक्याला कायमस्वरूपी अंधाराचा सामना करावा लागू शकतो, अशी भीती व्यक्त केली जात आहे.
