पिंपरी-चिंचवड : प्रतिनिधी
पिंपरी-चिंचवड पोलीस स्टेशनमध्ये न्यायसंबंधी प्रकरणे अयोग्य पद्धतीने हाताळली जात असून मनमानी व बेकायदेशीर कामकाज होत असल्याचा गंभीर आरोप काही नागरिकांकडून करण्यात येत आहे. या ठिकाणी खाजगी आर्थिक हितसंबंधांना मोकळीक दिली जात असल्याचेही आरोप तक्रारदारांकडून केले जात आहेत.
सदर पोलीस स्टेशन अंतर्गत शहराचा गावठाण तसेच जुना मध्यवर्ती भाग येत असून, या भागात कायदा व सुव्यवस्थेच्या प्रक्रियेत अनियमितता दिसून येत असल्याची भावना काही नागरिकांनी व्यक्त केली आहे. मात्र, राजकीय दहशत आणि भीतीमुळे अनेक नागरिक तक्रार नोंदविण्यास पुढे येत नसल्याचेही सांगितले जात आहे.
गजबजलेल्या वस्त्यांमध्ये अनैतिक व बेकायदेशीर व्यवहार वाढत असल्याचा आरोपही करण्यात आला असून, अशा परिस्थितीत सर्वसामान्य नागरिकांना अडचणींचा सामना करावा लागत असल्याचे तक्रारीत नमूद आहे.
दरम्यान, या सर्व आरोपांबाबत संबंधित प्रशासनाने चौकशी करून आवश्यक ती कार्यवाही करावी, अशी मागणी नागरिकांकडून होत आहे.
