एरंडोल : प्रतिनिधी
आपल्या मुलांना डॉक्टर घडविणाऱ्या श्रीमती गंगाबाई शिवाजी पवार यांचा जागतिक मातृदिन सप्ताहानिमित्त ऊर्जा सामाजिक शैक्षणिक संस्थेतर्फे विशेष गौरव करण्यात आला. कुटुंबासाठी आईसोबतच वडिलांचीही जबाबदारी समर्थपणे पार पाडल्याबद्दल त्यांचा सन्मान करण्यात आला.
कार्यक्रमाच्या अध्यक्षस्थानी ‘आईबाप जागर’चे प्रणेते तथा प्रसिद्ध वक्ते प्रवीण महाजन उपस्थित होते. तर ऊर्जा सामाजिक संस्थेच्या अध्यक्षा अंजली प्रवीण महाजन यांच्या हस्ते श्रीमती गंगाबाई पवार यांना शाल व बुके देऊन सन्मानित करण्यात आले.
स्व. डॉ. एस. ओ. पवार यांच्या निधनानंतर गंगाबाई पवार यांनी कुटुंबाचा आधार बनत मुलांचे शिक्षण आणि करिअर घडविण्यात महत्त्वाची भूमिका बजावली. त्यांचे मोठे सुपुत्र डॉ. संभाजी शिवाजी पवार हे ठाणे जिल्ह्यातील शहापूर येथे होमिओपॅथिक तज्ञ म्हणून कार्यरत असून, दुसरे सुपुत्र डॉ. परेश शिवाजी पवार हे अमळनेर येथील सरकारी रुग्णालयात वैद्यकीय अधिकारी पदावर कार्यरत आहेत. दोन्ही बंधूंची जळगाव व ठाणे जिल्ह्यात विशेष ओळख निर्माण झाली आहे.
अध्यक्षीय मनोगतात प्रवीण महाजन यांनी सांगितले की, “आई ही प्रत्येक कुटुंबासाठी श्रद्धा, प्रेरणा आणि भक्तीचा संगम असते. तिच्या कष्टांमुळेच कुटुंब घडते आणि पुढची पिढी सक्षम होते. अशा आदर्श मातांचा सन्मान करणे ही काळाची गरज आहे.”
कार्यक्रमास कु. स्वरा महाजन आणि कु. तेजस्विनी महाजन यांचीही उपस्थिती होती.
