करमाळा : प्रतिनिधी
देशाची शांतता, सुव्यवस्था आणि अखंडता राखण्यासाठी दहशतवाद व हिंसाचाराचा बिमोड करणे ही प्रत्येकाची जबाबदारी आहे, या उद्देशाने करमाळा पोलीस स्टेशनमध्ये ‘दहशतवाद व हिंसाचार विरोधी दिन’ साजरा करण्यात आला.
या कार्यक्रमाचे आयोजन पोलीस स्टेशनचे प्रभारी पोलीस निरीक्षक (PI) रणजीत माने यांच्या प्रमुख उपस्थितीत व मार्गदर्शनाखाली करण्यात आले. यावेळी सहाय्यक पोलीस निरीक्षक (API) पोपट टिळेकर यांनी शपथ वाचन करून दिले.
कार्यक्रमात सर्व पोलीस अधिकारी, अंमलदार तसेच कार्यालयीन कर्मचारी मोठ्या संख्येने उपस्थित होते. उपस्थित सर्वांनी दहशतवाद व हिंसाचाराविरुद्ध सामूहिक शपथ घेत देशाची एकता, अखंडता आणि मानवतेचे रक्षण करण्याचा संकल्प केला.
यावेळी बोलताना पोलीस निरीक्षक रणजीत माने यांनी सांगितले की, “समाजात शांतता व सलोखा टिकवून ठेवणे हे पोलीस दलाचे प्राथमिक कर्तव्य असून, कोणत्याही प्रकारच्या हिंसक प्रवृत्तीला थारा दिला जाणार नाही.”
या कार्यक्रमातून नागरिकांच्या सुरक्षिततेसाठी पोलीस दल सदैव तत्पर असल्याचा संदेश देण्यात आला.
