मुंबईच्या नवनिर्वाचित नगरसेविका श्वेता पावसकर यांचा वैभव नाईक यांच्या हस्ते सत्कार
कणकवली : प्रतिनिधी
शिवसेना उद्धव बाळासाहेब ठाकरे पक्षाच्या सिंधुदुर्ग जिल्हाप्रमुखपदी वैभव नाईक यांची निवड झाल्याबद्दल हरकूळ बु. येथील शिवसैनिकांच्या वतीने त्यांचा शाल व श्रीफळ देऊन सत्कार करण्यात आला. यावेळी हरकूळ बु. विभागप्रमुखपदी ओमप्रकाश ताम्हाणेकर यांची निवड करण्यात आली.
या प्रसंगी वैभव नाईक यांनी पुष्पगुच्छ देऊन ओमप्रकाश ताम्हाणेकर यांचे अभिनंदन केले. तसेच मुंबई महानगरपालिकेच्या नवनिर्वाचित नगरसेविका आणि विधी सेवा समिती सदस्य श्वेता पावसकर यांचाही सत्कार करण्यात आला.
कार्यक्रमात विविध हायस्कूलमधील दहावी आणि बारावी परीक्षेत प्रथम, द्वितीय व तृतीय क्रमांक मिळविणाऱ्या हरकूळ गावातील गुणवंत विद्यार्थ्यांचा गौरव करण्यात आला.
यावेळी मार्गदर्शन करताना वैभव नाईक म्हणाले, “शिवसेना पक्षाने नेहमीच सामान्य शिवसैनिकांना मोठ्या पदांवर काम करण्याची संधी दिली आहे. त्यामुळे अनेक शिवसैनिक आमदार, खासदार आणि नगरसेवक पदापर्यंत पोहोचले आहेत. संघटना वाढीसाठी पदाधिकाऱ्यांनी लोकांमध्ये राहून प्रामाणिकपणे काम केले पाहिजे.”
युवासेना जिल्हाप्रमुख सुशांत नाईक म्हणाले, “बदलत्या राजकीय परिस्थितीत हरकूळ गावात शिवसेना टिकवणे आव्हानात्मक होते, मात्र शिवसैनिकांनी एकजुटीने ते शक्य करून दाखवले. लवकरच रिक्त पदांवर नव्या पदाधिकाऱ्यांची नियुक्ती केली जाणार आहे.”
नगरसेविका श्वेता पावसकर यांनी आपल्या मनोगतात सांगितले की, “मी एक सामान्य शिवसैनिक असून उद्धव ठाकरे यांनी मला उमेदवारी देऊन निवडून आणले. मुंबईत काम करताना हरकूळ गावातील शिवसैनिकांच्या पाठीशी कायम उभी राहीन.”
या कार्यक्रमास युवासेना जिल्हाप्रमुख सुशांत नाईक, तालुकाप्रमुख प्रथमेश सावंत, नगरसेवक संकेत नाईक, विधानसभा प्रमुख राजेश पावसकर, ज्येष्ठ शिवसैनिक दिवाकर पारकर, फैयाज खान, मोहन तांबे, आनंद महाडेश्वर, पांडुरंग पारकर, श्रीधर चव्हाण, नासिर पटेल, लक्ष्मण खोचरे, शंकर परब, गणेश चव्हाण, महेश मोरये, अनिल जुवेकर, अंकुश परब, साक्षी खोचरे, सौ. कांदळकर, अशोक जुवेकर यांच्यासह शिवसैनिक व विद्यार्थी मोठ्या संख्येने उपस्थित होते.
