साईबाबा जन्मस्थान मंदिर येथे अधिक मासानिमित्त आज साईबाबांना १५० किलो आंब्यांची भव्य आरास करण्यात आली. छत्रपती संभाजीनगर येथील निस्सीम साईभक्त अमृता संकेत श्रॉफ आणि आरती यश पटेल यांनी ही सुंदर आंबा आरास व भोग अर्पण केला.
साईबाबांना आंबा अतिशय प्रिय असल्याची भावना ठेवून दोन्ही भक्त महिलांनी अत्यंत आकर्षक पद्धतीने आंब्यांची सजावट केली. यावेळी पंचपक्वान्नांचा नैवेद्यही साईबाबांना अर्पण करण्यात आला.
या आंबा उत्सवासाठी श्री व सौ. अनिल बल्लाळ, संकेत श्रॉफ, यश पटेल, सौ. नीलिमा भुसारी, श्री व सौ. युवराज पातूरकर, सागर पातूरकर, कार्यकारी विश्वस्त अतुल चौधरी तसेच विश्वस्त संजय भुसारी उपस्थित होते.
यावेळी पुजारी योगेश गुरुजी आणि अजय गुरुजी यांनी विधीवत अभिषेक व पूजा संपन्न केली. आंब्याची आरास आणि डेकोरेशनसाठी मंदिरातील सेवेकरी पाटील, बालाजी आणि सौ. लक्ष्मी यांनी विशेष सहकार्य केले.
अधिक मासामुळे सध्या मंदिरात दर्शनासाठी भाविकांची मोठ्या प्रमाणावर गर्दी होत असल्याचे मंदिर प्रशासनाने सांगितले.
