बीड प्रतिनिधी
मोमीनपुरा पेठ परिसरात नागरिकांमध्ये दहशत निर्माण केल्याच्या आरोपाखाली शेख नाजिया शेख पाशा या महिलेला पुढील सहा महिन्यांसाठी बीड जिल्ह्यातून तडीपार करण्यात आले आहे. उपविभागीय दंडाधिकारी कविता जाधव यांनी २० मे रोजी हा आदेश जारी केला.
मिळालेल्या माहितीनुसार, संबंधित महिलेविरुद्ध २०१४ ते २०२४ या कालावधीत जादूटोणा आणि नागरिकांची फसवणूक केल्याप्रकरणी एकूण १० गंभीर गुन्हे दाखल आहेत. तिच्या कृत्यांमुळे नागरिकांच्या जीवित आणि मालमत्तेला धोका निर्माण झाल्याचे प्रशासनाच्या निदर्शनास आले होते.
परिस्थितीचे गांभीर्य लक्षात घेऊन महाराष्ट्र पोलीस अधिनियम १९५१ मधील कलम ५६ (१) (अ) अंतर्गत ही कारवाई करण्यात आली आहे.
आदेशानुसार, संबंधित महिलेला दोन दिवसांच्या आत बीड जिल्ह्याची हद्द सोडण्याचे निर्देश देण्यात आले आहेत. पुढील सहा महिन्यांच्या कालावधीत उपविभागीय दंडाधिकाऱ्यांच्या पूर्वपरवानगीशिवाय तिला जिल्ह्यात प्रवेश करता येणार नाही.
तसेच तडीपारीच्या काळात ती ज्या ठिकाणी वास्तव्यास असेल, त्या परिसरातील जवळच्या पोलीस ठाण्यात दर आठवड्याला हजेरी लावणे बंधनकारक करण्यात आले आहे. जिल्हा सोडल्यानंतर दहा दिवसांच्या आत संबंधित पोलिसांना माहिती देणेही आवश्यक राहणार आहे.
दरम्यान, या कारवाईमुळे स्थानिक नागरिकांमध्ये समाधानाचे वातावरण निर्माण झाले असून प्रशासनाच्या निर्णयाचे स्वागत करण्यात येत आहे.
