शेतकऱ्यांना आधुनिक शेतीचे मार्गदर्शन; सामाजिक उपक्रमाला महिलांचा उत्स्फूर्त प्रतिसाद
मळद (प्रतिनिधी): ग्रामीण व आदिवासी भागातील शेतकऱ्यांना आधुनिक शेती तंत्रज्ञानाची माहिती मिळावी, शेती उत्पादनात वाढ व्हावी आणि कृषीविषयक जनजागृती निर्माण व्हावी, या उद्देशाने कृषी विज्ञान केंद्र, बारामती यांच्या वतीने जिरेगाव येथे शेतकऱ्यांना जैविक खते व कीटकनाशकांचे वाटप करण्यात आले. या उपक्रमातून शेतकऱ्यांना पीक व्यवस्थापन, पीक संरक्षण आणि आधुनिक शेती पद्धतींबाबत मार्गदर्शन करण्यात आले.
या कार्यक्रमासाठी कृषी विज्ञान केंद्राचे अधिकारी प्रशांत गावडे सर आणि शास्त्रज्ञ कालांडे सर उपस्थित होते. त्यांनी शेतकऱ्यांना जैविक खते व कीटकनाशकांचा योग्य वापर, पिकांची निगा, पीक संरक्षण तसेच शेती उत्पादन वाढविण्यासाठी आवश्यक उपाययोजनांची माहिती दिली.
समाजसेवेतून कृषी विकासाला हातभार
ग्रामीण व आदिवासी भागातील नागरिकांना शिक्षण, शेतीविषयक आधुनिक तंत्रज्ञान आणि विविध शासकीय व सामाजिक योजनांची माहिती मिळावी, या उद्देशाने हा उपक्रम राबविण्यात आला. समाजसेवा हीच खरी ईश्वरसेवा या भावनेतून आयोजित करण्यात आलेल्या या उपक्रमामुळे शेतकऱ्यांना प्रोत्साहन मिळाले.
या कार्यक्रमाच्या आयोजनासाठी समाजसेवक बहादुर चव्हाण, जाणता मामा भोसले, मच्छिंद्र भोसले, इतिहास भोसले, दीपक शिंदे, विशाल चव्हाण, सार्थक काळे आणि भैया काळे यांनी सहकार्य केले.
कार्यक्रमाला महिलांचा उत्स्फूर्त प्रतिसाद लाभला. यावेळी बीना चव्हाण, विजया भोसले, जमुना भोसले, करिश्मा चव्हाण, राणी काळे, समृद्धी चव्हाण आणि त्रिशुला चव्हाण यांच्यासह अनेक महिला उपस्थित होत्या.
या सामाजिक व कृषीविषयक उपक्रमाचे आयोजन प्रशांत चव्हाण सर यांनी केले होते. शेतकऱ्यांना शेतीविषयक ज्ञान, आधुनिक तंत्रज्ञान आणि आवश्यक कृषी निविष्ठा उपलब्ध करून देण्याच्या या उपक्रमाचे उपस्थित नागरिकांनी कौतुक केले. भविष्यातही ग्रामीण व आदिवासी भागाच्या विकासासाठी अशा प्रकारचे सामाजिक आणि कृषीविषयक उपक्रम सातत्याने राबविण्याचा संकल्प यावेळी व्यक्त करण्यात आला.
