🚨 दर्यापुरात ई-बाईक ग्राहकांची कोंडी: ‘माही ई-बायक्स’ कडून गाडी विकली, पण सर्व्हिस गायब; ग्राहक हवालदील!
विशेष प्रतिनिधी, दर्यापूर
दर्यापूर येथील बनोसा परिसरातील ‘माही ई-बायक्स’ (Mahi E-Bikes) या यो बाईक्स (Yo Bykes) च्या शोरूम चालकाकडून ग्राहकांची मोठी फसवणूक होत असल्याचा प्रकार समोर आला आहे.ग्राहकांना लाखो रुपयांच्या गाड्या विकल्यानंतर, त्यांना कोणतीही मोफत किंवा सशुल्क सर्व्हिस (Service) दिली जात नसल्याचा गंभीर आरोप ग्राहकांनी केला आहे. शोरूम चालकाच्या या आडमुठ्या धोरणामुळे नवीन गाड्या घरीच धूळ खात पडून आहेत.
📌 काय आहे मुख्य समस्या?
मिळालेल्या माहितीनुसार, दर्यापूर आणि परिसरातील शेकडो ग्राहकांनी पर्यावरणपूरक आणि पेट्रोलचे पैसे वाचवण्यासाठी ‘माही ई-बायक्स’ मधून यो कंपनीच्या इलेक्ट्रिक गाड्या खरेदी केल्या. गाडी घेताना ग्राहकांना मोफत सर्व्हिसिंग, बॅटरी वॉरंटी आणि सुटे भाग (Spare Parts) वेळेवर देण्याची मोठी आश्वासने देण्यात आली होती. मात्र, गाडी खरेदी केल्यानंतर अवघ्या काही दिवसांतच शोरूम चालकाने आपला खरा चेहरा दाखवला. गाड्यांमध्ये तांत्रिक बिघाड झाल्यास किंवा सर्व्हिसिंगची वेळ आल्यास ग्राहकांना हक्काची सेवा देण्यास साफ नकार दिला जात आहे. व फोन पण उचलत नाही.
🔋 बॅटरी आणि पार्ट्ससाठी ग्राहकांची वणवण
इलेक्ट्रिक गाडीमध्ये सर्वात महत्त्वाचा भाग हा बॅटरी आणि मोटर असतो. अनेक ग्राहकांच्या गाड्यांची बॅटरी वॉरंटी पिरीयडमध्येच खराब झाली आहे. ग्राहक जेव्हा ही बॅटरी बदलण्यासाठी किंवा दुरुस्तीसाठी शोरूममध्ये जातात, तेव्हा त्यांना “कंपनीकडून पार्ट्स आले नाहीत” किंवा “अजून काही दिवस लागतील” अशी उडवाउडवीची उत्तरे दिली जातात. अनेक महिने उलटूनही ग्राहकांना सर्व्हिस मिळत नसल्याने लाखो रुपये खर्च करून घेतलेल्या गाड्या केवळ शोभेची वस्तू बनल्या आहेत.
😤 ग्राहकांमध्ये तीव्र असंतोष, पोलिसांत धाव घेणार
“आम्ही रोख पैसे देऊन गाडी खरेदी केली. आता गाडीत बिघाड झाला असून शोरूमचे मेकॅनिक ती दुरुस्त करत नाहीत. कंपनीच्या वॉरंटी कार्डला देखील हे दुकानदार मानत नाहीत,” अशी संतप्त प्रतिक्रिया एका पीडित ग्राहकाने दिली. शोरूम मालकाच्या या फसवणुकी विरोधात आता दर्यापूरमधील अनेक ग्राहक एकत्र आले असून, ते ग्राहक मंच (Consumer Court) आणि स्थानिक पोलीस ठाण्यात अधिकृत तक्रार दाखल करण्याच्या तयारीत आहेत.
