अंबाजोगाई | प्रतिनिधी
वसुंधरा सेवा प्रतिष्ठान, अंबाजोगाई यांच्या वतीने आयोजित ‘गुणवंत विद्यार्थी सत्कार समारंभ – २०२६’ हा कार्यक्रम आद्यकवी मुकुंदराज स्वामी सभागृहात उत्साहपूर्ण वातावरणात संपन्न झाला. केज विधानसभा मतदारसंघातील दहावी व बारावी परीक्षेत उल्लेखनीय यश संपादन करणाऱ्या गुणवंत विद्यार्थ्यांचा यावेळी गौरव करण्यात आला.
या कार्यक्रमास केज विधानसभा मतदारसंघाच्या आमदार सौ. नमिता अक्षय मुंदडा यांनी प्रमुख उपस्थिती लावली. त्यांनी गुणवंत विद्यार्थ्यांचा सत्कार करून त्यांच्या यशाबद्दल अभिनंदन केले व पुढील शैक्षणिक वाटचालीसाठी शुभेच्छा दिल्या.
यावेळी बोलताना आमदार मुंदडा यांनी विद्यार्थ्यांनी कठोर परिश्रम, जिद्द, चिकाटी आणि सातत्यपूर्ण अभ्यासाच्या बळावर हे यश संपादन केल्याचे सांगितले. शिक्षणाच्या माध्यमातून समाजात सकारात्मक परिवर्तन घडवून आणण्याची क्षमता विद्यार्थ्यांमध्ये असून आगामी काळात विविध क्षेत्रांमध्ये यशाची नवी शिखरे सर करून ते समाज व राष्ट्राच्या प्रगतीत मोलाचे योगदान देतील, असा विश्वास त्यांनी व्यक्त केला.
कार्यक्रमास युवानेते अक्षय भैय्या मुंदडा, विविध क्षेत्रांतील मान्यवर, वसुंधरा सेवा प्रतिष्ठानचे पदाधिकारी व कार्यकर्ते, विद्यार्थी आणि पालक मोठ्या संख्येने उपस्थित होते.
गुणवंत विद्यार्थ्यांच्या यशाचा गौरव करत त्यांना पुढील वाटचालीसाठी प्रेरणा देणारा हा सत्कार सोहळा उत्साहात आणि प्रेरणादायी वातावरणात पार पडला.
