वाडी | प्रतिनिधी
वाडी पोलीस ठाण्याच्या हद्दीतील लावा ग्रामपंचायत परिसरातील साई सृष्टी अपार्टमेंटजवळ गायीच्या वासराचे धडापासून वेगळे झालेले शीर आढळून आल्याने परिसरात एकच खळबळ उडाली आहे. या घटनेमुळे स्थानिक नागरिकांमध्ये भीती आणि घबराटीचे वातावरण निर्माण झाले आहे.
स्थानिक युवक अजय पाटणे यांना ही बाब निदर्शनास आल्यानंतर त्यांनी तात्काळ वाडी पोलिसांना माहिती दिली. माहिती मिळताच पोलिसांनी घटनास्थळी धाव घेत पाहणी केली. घटनेची माहिती परिसरात पसरताच मोठ्या संख्येने नागरिक घटनास्थळी जमा झाले.
घटनेचे गांभीर्य लक्षात घेऊन पोलिसांसह फॉरेन्सिक पथक तसेच पशुसंवर्धन विभागाचे अधिकारी आणि कर्मचारी घटनास्थळी दाखल झाले. त्यांनी पुरावे संकलित करून तपासाची प्रक्रिया सुरू केली आहे.
या प्रकरणी वाडी पोलिसांनी महाराष्ट्र प्राणी संरक्षण कायद्यातील कलम ५ व ९, प्राणी क्रूरता प्रतिबंधक कायदा १९६० मधील कलम ११ (१) (एल) तसेच भारतीय न्याय संहिता (BNS) कलम ३२५ अन्वये गुन्हा दाखल केला आहे.
घटनेमागील कारणांचा शोध घेण्यासाठी पोलीस विविध अंगांनी तपास करीत असून संबंधित आरोपींचा शोध सुरू असल्याची माहिती पोलिसांकडून देण्यात आली आहे. स्थानिक नागरिकांनी दोषींवर कठोर कारवाई करण्याची मागणी केली आहे.
