चंदगड | प्रतिनिधी
जागतिक पर्यावरण दिनाच्या निमित्ताने ऐतिहासिक किल्ले पारगड येथे आयोजित करण्यात आलेल्या ‘स्टॉफ इंडिया पारगड हेरिटेज रन’ मॅरेथॉन स्पर्धेची सर्व तयारी पूर्ण झाली असून, येत्या ७ जून २०२६ रोजी होणाऱ्या या भव्य स्पर्धेत सुमारे ३ हजार धावपटू सहभागी होणार असल्याचा अंदाज आयोजकांनी व्यक्त केला आहे.
या स्पर्धेला धावपटूंचा उत्स्फूर्त प्रतिसाद मिळत असून, २ जून अखेरपर्यंत १,४१८ स्पर्धकांनी ऑनलाइन नोंदणी केली आहे. यामध्ये २२१ महिला आणि १,१९७ पुरुष धावपटूंचा समावेश आहे.
स्पर्धेचे स्वरूप व बक्षिसे
यंदा या स्पर्धेचे पाचवे वर्ष असून, स्पर्धा ५, १० आणि २१ किलोमीटर अशा तीन गटांमध्ये आयोजित करण्यात आली आहे. विविध गटांतील विजेत्यांना मिळून एकूण १ लाख रुपयांची रोख बक्षिसे देऊन गौरविण्यात येणार आहे.
सामाजिक व ऐतिहासिक उपक्रमांची मेजवानी
स्पर्धेच्या निमित्ताने ५ ते ७ जून या कालावधीत विविध सामाजिक, पर्यावरणपूरक आणि ऐतिहासिक उपक्रमांचे आयोजन करण्यात आले आहे. त्यामध्ये –
- पर्यावरण जनजागृती अभियान
- प्लास्टिकमुक्त अभियान
- शिवराज्याभिषेक दिन सोहळा
- ऐतिहासिक शस्त्रास्त्र प्रदर्शन
यांचा समावेश आहे.
स्पर्धकांसाठी विशेष सुविधा
स्पर्धेची सुरुवात आणि सांगता किल्ले पारगड येथील ऐतिहासिक भवानी मंदिर परिसरात होणार आहे. सहभागी धावपटूंना पुढील सुविधा उपलब्ध करून देण्यात येणार आहेत –
- वैद्यकीय सुविधा
- पिण्याच्या पाण्याची व्यवस्था
- सहभाग प्रमाणपत्र
- स्मृतिपदक (मेडल)
- पर्यावरणपूरक रोपटे
- टी-शर्ट
विद्यार्थ्यांना मोफत सहभाग
कोल्हापूर जिल्ह्यातील शाळा व महाविद्यालयीन विद्यार्थ्यांसाठी या स्पर्धेत विनामूल्य प्रवेश देण्यात आला आहे. जिल्ह्यातील अधिकाधिक विद्यार्थी, युवा आणि नागरिकांनी या अनोख्या वारसा-दौडीत सहभागी व्हावे, असे आवाहन स्पर्धा प्रमुख प्रवीण चिरमुरे यांनी केले आहे.
ही स्पर्धा केवळ क्रीडा स्पर्धा नसून पर्यावरण संवर्धन, इतिहास जागृती आणि आरोग्यदायी जीवनशैलीचा संदेश देणारा उपक्रम ठरणार असल्याचे आयोजकांनी सांगितले.
