धाराशिव | प्रतिनिधी
धाराशिव शहरातील एका स्पा सेंटरच्या आडून सुरू असलेल्या कथित अनैतिक देहव्यापारावर पोलिसांनी धडक कारवाई करत पाच महिलांची सुटका केली आहे. या प्रकरणी संबंधित व्यवस्थापक, चालक आणि इतर आरोपींविरुद्ध अनैतिक मानवी वाहतूक (प्रतिबंध) अधिनियम, १९५६ (PITA) अंतर्गत गुन्हा दाखल करण्यात आला आहे.
पोलीस अधीक्षक रीतु खोखर आणि अपर पोलीस अधीक्षक सचिन पांडकर यांच्या मार्गदर्शनाखाली ही कारवाई करण्यात आली. परिविक्षाधीन पोलीस उपअधीक्षक अमोल मोहिते यांना मिळालेल्या गोपनीय माहितीच्या आधारे शहरातील ओरा (Aura) स्पा सेंटर येथे दि. २ जून २०२६ रोजी छापा टाकण्यात आला.
पंटरच्या माध्यमातून माहितीची खातरजमा
स्पा सेंटरमध्ये अनैतिक व्यवसाय सुरू असल्याचा संशय असल्याने पोलिसांनी प्रथम पंटरच्या माध्यमातून माहितीची खातरजमा केली. त्यानंतर शासकीय पंचांच्या उपस्थितीत नियोजनबद्ध कारवाई करण्यात आली. छाप्यादरम्यान स्पा सेंटरमध्ये अनैतिक व्यापार सुरू असल्याचे आढळून आल्याची माहिती पोलिसांनी दिली.
पाच महिलांची सुटका
कारवाईदरम्यान पोलिसांनी पाच महिलांची सुटका केली. संबंधित महिलांना पुढील कायदेशीर प्रक्रिया आणि पुनर्वसनासाठी संबंधित प्राधिकरणाकडे पाठविण्यात आले आहे. तसेच या रॅकेटमध्ये सहभागी असलेल्या व्यवस्थापक, चालक आणि इतर संबंधितांविरुद्ध गुन्हा नोंदविण्यात आला आहे.
विशेष पथकाचा सहभाग
या कारवाईत परिविक्षाधीन पोलीस उपअधीक्षक अमोल मोहिते, पोलीस निरीक्षक एम. एन. शेळके (AHTU), पोलीस उपनिरीक्षक सोनटक्के, तसेच पोलीस अंमलदार माने, दूधभाते, कंदळे, नाईकवडी, किवंडे, केवके आणि महिला पोलीस हवालदार पुरी, जाधव यांच्यासह इतर कर्मचाऱ्यांचा सहभाग होता.
अवैध धंद्यांविरोधात विशेष मोहीम
धाराशिव जिल्ह्यात सुरू असलेल्या अवैध धंद्यांविरोधातील विशेष मोहिमेअंतर्गत ही कारवाई करण्यात आली आहे. जिल्ह्यातील बेकायदेशीर आणि अनैतिक व्यवसायांवर अंकुश ठेवण्यासाठी पोलीस प्रशासनाने कठोर भूमिका घेतली असून या मोहिमेची विशेष जबाबदारी पोलीस उपअधीक्षक अमोल मोहिते यांच्याकडे सोपविण्यात आली आहे.
पोलीस अधीक्षक रीतु खोखर यांनी सांगितले की, जिल्ह्यातील अवैध व्यवसाय, अनैतिक कृत्ये आणि बेकायदेशीर धंद्यांविरोधातील कारवाई यापुढेही अधिक तीव्र करण्यात येणार असून अशा प्रकारच्या कृत्यांमध्ये सहभागी असलेल्यांवर कठोर कारवाई केली जाईल.
या कारवाईमुळे धाराशिव शहरात खळबळ उडाली असून प्रकरणाचा पुढील तपास सुरू आहे.
