धाराशिव, दि. ३ जून
उस्मानाबाद-लातूर-बीड स्थानिक प्राधिकारी मतदारसंघाच्या द्विवार्षिक विधान परिषद निवडणूक २०२६ साठी येत्या १८ जून रोजी मतदान होणार आहे. निवडणूक आचारसंहितेचे काटेकोर पालन करून ही निवडणूक निर्भय, नि:पक्षपणे आणि मुक्त वातावरणात पार पडेल याची दक्षता घ्यावी, असे निर्देश निवडणूक निरीक्षक मिलिंद बोरकर यांनी दिले.
जिल्हाधिकारी कार्यालयातील सभागृहात बुधवारी (दि. ३) आयोजित निवडणूक तयारी आढावा बैठकीत ते बोलत होते.
यावेळी कीर्ती किरण पुजार, प्रियंवदा म्हाडदळकर, रीतु खोखर, ज्योती पाटील, नीलेश काळे, विद्याचरण कडवकर, शिरीष यादव, प्रवीण धरमकर, संतोष राऊत, स्वाती शेंडे, अरुणा गायकवाड, ओंकार देशमुख, हर्षल डाके, विवेक खडसे, डॉ. मृणाल जाधव आणि अमोघ भुजबळ यांच्यासह विविध विभागांचे अधिकारी उपस्थित होते. तसेच लातूर व बीड जिल्ह्यातील अधिकारी ऑनलाइन पद्धतीने सहभागी झाले.
बैठकीत मार्गदर्शन करताना मिलिंद बोरकर यांनी सांगितले की, राष्ट्रीयकृत बँकांचे अधिकारी या निवडणुकीत सूक्ष्म निरीक्षक म्हणून काम पाहणार आहेत. मतदान साहित्य वितरण व स्वीकृती केंद्राचे काम योग्य पद्धतीने पार पाडावे. मतपेट्या सुरक्षितपणे मतदान केंद्रावर पोहोचविणे तसेच मतदानानंतर सीलबंद मतपेट्यांची वाहतूक कडक सुरक्षा व्यवस्थेत करावी. या प्रक्रियेत कोणतीही त्रुटी राहू नये, याची विशेष काळजी घ्यावी.
मतदान प्रक्रियेची माहिती वेळोवेळी संकलित करावी तसेच मतदान केंद्रांवर वेबकास्टिंगची व्यवस्था करावी, असेही त्यांनी सांगितले. दिव्यांग मतदारांसाठी रॅम्प आणि व्हीलचेअरची सुविधा उपलब्ध ठेवण्याचे निर्देशही त्यांनी दिले.
निवडणूक काळात कोणताही अनुचित प्रकार घडणार नाही याची खबरदारी घेऊन आचारसंहितेची प्रभावी अंमलबजावणी करावी. प्राप्त होणाऱ्या तक्रारींची तात्काळ दखल घेऊन निवडणूक प्रक्रिया पूर्णपणे नि:पक्षपाती राहील याची दक्षता घ्यावी, असेही त्यांनी स्पष्ट केले.
यावेळी जिल्हाधिकारी कीर्ती किरण पुजार यांनी मतदान पथकांना सर्व टप्प्यांतील प्रशिक्षण परिपूर्णपणे देण्याच्या सूचना केल्या. तसेच आचारसंहिता भंग होणार नाही यासाठी सर्व संबंधित विभागांनी सतर्क राहावे, असे आवाहन केले.
उपजिल्हा निवडणूक अधिकारी शिरीष यादव यांनी निवडणुकीची माहिती देताना सांगितले की, या निवडणुकीत जिल्हा परिषद, महानगरपालिका, नगरपालिका आणि नगरपंचायतींचे मिळून एकूण ९८८ मतदार मतदानाचा हक्क बजावणार आहेत. बीड जिल्हा परिषदेची निवडणूक अद्याप झालेली नसल्यामुळे त्या जिल्ह्यातील जिल्हा परिषद सदस्य मतदार यादीत समाविष्ट नसल्याची माहिती त्यांनी दिली.
बैठकीस लातूर आणि बीड जिल्ह्यांतील निवडणूक प्रक्रियेशी संबंधित विविध विभागांचे अधिकारी ऑनलाइन माध्यमातून उपस्थित होते.
