उमरगा | प्रतिनिधी :
महाराष्ट्र राज्याचे महसूल मंत्री चंद्रशेखर बावनकुळे यांची मंत्रालय, मुंबई येथे राष्ट्रीय मोदी सेवा समिती (भाजपा) महाराष्ट्र राज्य युवा मोर्चाचे प्रदेशाध्यक्ष तसेच लोकशाही पत्रकार संघ, महाराष्ट्र राज्याचे युवा प्रदेशाध्यक्ष किशोर पवार यांनी सदिच्छा भेट घेतली.
या भेटीदरम्यान राज्यातील विविध महत्त्वाच्या विषयांवर सविस्तर चर्चा करण्यात आली. युवकांच्या समस्या, सामाजिक उपक्रम, संघटनात्मक कामकाज तसेच पत्रकार संघटनांच्या बळकटीकरणासंदर्भातील विविध मुद्दे मंत्री महोदयांसमोर मांडण्यात आले. चर्चेदरम्यान अनेक विषयांवर सकारात्मक चर्चा होऊन पुढील कार्यवाहीबाबत दिशा निश्चित करण्यात आली.
यावेळी किशोर पवार यांनी राष्ट्रीय मोदी सेवा समिती (RMSS) महाराष्ट्र तसेच लोकशाही पत्रकार संघाच्या विविध उपक्रमांचा आणि कार्याचा सविस्तर आढावा सादर केला. संघटनेची उद्दिष्टे, राज्यभर सुरू असलेले सामाजिक उपक्रम आणि आगामी योजनांची माहितीही त्यांनी दिली.
भेटीदरम्यान महसूल मंत्री चंद्रशेखर बावनकुळे यांनी संघटनेच्या कार्याबद्दल समाधान व्यक्त करत सामाजिक आणि जनहिताच्या उपक्रमांसाठी भविष्यात आवश्यक सहकार्य करण्याची भूमिका व्यक्त केली.
ही भेट संघटनेच्या दृष्टीने महत्त्वपूर्ण ठरली असून आगामी काळातील सामाजिक, संघटनात्मक आणि पत्रकार हिताच्या कार्यासाठी नवी ऊर्जा व प्रेरणा देणारी ठरल्याची भावना उपस्थितांनी व्यक्त केली.
