अकोला | प्रतिनिधी
अवैध शस्त्रनिर्मिती आणि शस्त्र तस्करीविरोधात राबविण्यात येत असलेल्या ‘ऑपरेशन प्रहार’ अंतर्गत दहीहंडा पोलिसांनी मोठी कारवाई करत देशी कट्टे तयार करणाऱ्या आरोपीचा पर्दाफाश केला आहे. या कारवाईत शस्त्रनिर्मितीसाठी वापरले जाणारे साहित्य जप्त करण्यात आले असून आरोपीला हरियाणातील कारागृहातून ताब्यात घेऊन चौकशी करण्यात आली.
स्थानिक गुन्हे शाखेला ३० एप्रिल रोजी मिळालेल्या गोपनीय माहितीच्या आधारे दत्ता मोहोड आणि अक्षय मोहोड यांना ताब्यात घेण्यात आले होते. त्यांच्याकडून एक देशी कट्टा आणि जिवंत काडतूस जप्त करण्यात आले. पुढील तपासादरम्यान शेख अकबर शेख हारून याच्याकडून आणखी एक गावठी पिस्तूल आणि जिवंत काडतूस हस्तगत करण्यात आले.
या कारवाईत पोलिसांनी दोन गावठी पिस्तुले, दोन जिवंत काडतुसे, मोटारसायकल आणि मोबाईल फोन असा सुमारे २ लाख २२ हजार रुपयांचा मुद्देमाल जप्त केला. याप्रकरणी दहीहंडा पोलीस ठाण्यात आर्म्स अॅक्टन्वये गुन्हा दाखल करण्यात आला होता.
तपासादरम्यान किस्मतसिंग तकदीरसिंग (रा. पाचोरी, जि. बुऱ्हाणपूर, मध्यप्रदेश) याचे नाव समोर आले. मोबाईल क्रमांकांच्या तांत्रिक विश्लेषणातून संबंधित आरोपी हा हरियाणातील पालवल जिल्ह्यातील हठीन पोलीस ठाण्यातील आर्म्स अॅक्टच्या एका प्रकरणात अटक होऊन फरीदाबाद येथील निमका कारागृहात न्यायालयीन कोठडीत असल्याचे निष्पन्न झाले.
दहीहंडा पोलिसांनी ३० मे रोजी आरोपीला कारागृहातून ताब्यात घेऊन न्यायालयाकडून पोलीस कोठडी मिळवली. चौकशीदरम्यान आरोपीने स्वतः देशी कट्टे तयार करत असल्याची कबुली दिली. त्यानंतर पोलिसांनी मध्यप्रदेशातील त्याच्या राहत्या घरावर छापा टाकून ग्राइंडर मशीन, लोखंडी कानस, करवत, छन्नी, हातोडी, सांडशी यांसह शस्त्रनिर्मितीसाठी वापरले जाणारे साहित्य जप्त केले.
या कारवाईमुळे अवैध शस्त्रनिर्मितीचे जाळे उघडकीस आले असून या प्रकरणात आणखी काही धागेदोरे समोर येण्याची शक्यता पोलिसांनी व्यक्त केली आहे. मध्यप्रदेशातून जप्त करण्यात आलेल्या साहित्याबाबत पुढील तपास सुरू आहे.
ही कारवाई अर्चित चांडक, बी. चंद्रकांत रेड्डी तसेच निखिल पाटील यांच्या मार्गदर्शनाखाली दहीहंडा पोलीस ठाण्याचे ठाणेदार गोपाल ढोले यांच्या नेतृत्वात पार पडली.
कारवाईत हेड कॉन्स्टेबल सागर कापसे, पीएसआय सोपान डाभेराव, पोलीस हवालदार रवी डाभेराव, पोलीस कॉन्स्टेबल प्रदीप राऊत, माधव कोरे, सन्नी वाकोडे, विजय वागतकर आणि नवनाथ कोकाटे यांनी सहभाग घेतला.
अवैध शस्त्र व्यवहाराविरोधातील या धडक कारवाईमुळे परिसरातील गुन्हेगारी प्रवृत्तींमध्ये खळबळ उडाली असून पोलिसांच्या कारवाईचे सर्व स्तरांतून स्वागत होत आहे.
