श्रीरामपूर | प्रतिनिधी
श्रीरामपूर तालुक्यातील बाभळेश्वर रोडवरील खंडाळा गावात एक धक्कादायक घटना उघडकीस आली असून, मुलानेच आपल्या वडिलांचा खून केल्याने परिसरात खळबळ उडाली आहे. शेतकरी सचिन प्रभाकर ढोकचोळे (वय ५५) यांचा त्यांच्याच सख्ख्या मुलाने कुदळीने वार करून खून केल्याची घटना बुधवारी (दि. ३ जून) पहाटे घडली.
मिळालेल्या माहितीनुसार, प्रणव सचिन ढोकचोळे (वय २५) याने घरातच वडिलांच्या डोक्यात कुदळीने वार केला. या हल्ल्यात गंभीर जखमी झालेल्या सचिन ढोकचोळे यांचा घटनास्थळीच मृत्यू झाला.
घटनेची माहिती मिळताच नितीन देशमुख यांच्या नेतृत्वाखाली श्रीरामपूर शहर पोलीस घटनास्थळी दाखल झाले. पोलिसांनी तातडीने तपासाची सूत्रे हाती घेत आरोपी प्रणव ढोकचोळे याला ताब्यात घेतले आहे. घटनास्थळाचा पंचनामा करण्यात आला असून गुन्हा दाखल करण्याची प्रक्रिया सुरू आहे.
खून नेमका कोणत्या कारणातून झाला, याचा तपास पोलीस करीत आहेत. घरगुती वादातून ही घटना घडली की यामागे अन्य काही कारण आहे, याबाबत अद्याप स्पष्ट माहिती समोर आलेली नाही. गावात आरोपी मानसिक आजाराने ग्रस्त असल्याची चर्चा असली तरी त्याबाबत अधिकृत दुजोरा मिळालेला नाही.
मुलानेच वडिलांचा खून केल्याच्या या घटनेमुळे खंडाळा गावासह संपूर्ण श्रीरामपूर तालुक्यात हळहळ व्यक्त होत असून परिसरात शोककळा पसरली आहे. पोलिसांकडून प्रकरणाचा पुढील तपास सुरू आहे.
