दौंड-यवत | प्रतिनिधी
यवत पोलीस ठाण्यात दाखल असलेल्या चोरीच्या गुन्ह्यात अटक करण्यात आलेला आरोपी दौंड उपकारागृहात दाखल करण्यापूर्वी पोलिसांच्या ताब्यातून पसार झाला होता. मात्र, यवत पोलिसांनी तातडीने शोधमोहीम राबवत आंध्रप्रदेशातील त्याच्या मूळ गावी जाऊन आरोपीला पुन्हा ताब्यात घेण्यात यश मिळविले.
यवत पोलीस ठाण्यात गुन्हा रजिस्टर क्रमांक ४९७/२०२६ अंतर्गत भारतीय न्याय संहिता (BNS) कलम ३०३(२) अन्वये दाखल गुन्ह्यात व्यंकटेश नान तरपतैया (वय ३०, रा. येल्लूर, विजयवाडा, आंध्रप्रदेश) याचा सहभाग निष्पन्न झाल्याने त्याला १ जून रोजी अटक करण्यात आली होती.
अटकेनंतर आरोपीला दौंड उपकारागृहात दाखल करण्यासाठी पोलीस हवालदार विकास कापरे आणि पोलीस कॉन्स्टेबल किरण तुपे हे घेऊन जात होते. दौंड येथे पोहोचल्यानंतर आवश्यक वैद्यकीय तपासणी प्रमाणपत्राची झेरॉक्स प्रत काढण्यासाठी वाहन थांबविण्यात आले. यावेळी पोलीस हवालदार विकास कापरे झेरॉक्स काढण्यासाठी खाली उतरले असता आरोपीने वाहनाचा दरवाजा उघडून अचानक पळ काढला.
पोलीस कॉन्स्टेबल किरण तुपे यांनी आरोपीचा पाठलाग करून त्याला अडविण्याचा प्रयत्न केला. मात्र आरोपीने त्यांना धक्का देऊन खाली पाडले आणि घटनास्थळावरून पसार झाला.
घटनेची माहिती मिळताच यवत व दौंड पोलिसांनी संयुक्तरीत्या विशेष शोधमोहीम हाती घेतली. आरोपीच्या संभाव्य ठिकाणांची पडताळणी करण्यात आली तसेच त्याच्या मूळ गावीही विशेष पथके रवाना करण्यात आली.
अखेर ३ जून रोजी आंध्रप्रदेशातील येल्लूर (विजयवाडा) येथे आरोपीचा शोध घेऊन त्याला पुन्हा ताब्यात घेण्यात पोलिसांना यश आले. आरोपीला ताब्यात घेतल्यानंतर पुढील कायदेशीर प्रक्रिया सुरू करण्यात आली आहे.
ही कारवाई संदीपसिंह गिल, गणेश बिरादार आणि बापुराव दडस यांच्या मार्गदर्शनाखाली पार पडली.
आरोपीच्या अटकेमुळे यवत पोलिसांच्या तत्परतेचे कौतुक होत असून, फरार आरोपीचा अल्पावधीत शोध घेऊन त्याला पुन्हा जेरबंद करण्यात पोलिसांना यश आले आहे.
