भोर | प्रतिनिधी –
काँग्रेस पक्षाचे ज्येष्ठ नेते, महाराष्ट्राचे माजी शिक्षणमंत्री आणि भोर-वेल्हा-मुळशी मतदारसंघाचे माजी आमदार अनंतराव थोपटे यांचे गुरुवार (दि. ४ जून) रोजी सायंकाळी साडेसात वाजण्याच्या सुमारास पुण्यातील दीनानाथ मंगेशकर रुग्णालय येथे निधन झाले. ते ९३ वर्षांचे होते. काही दिवसांपासून ते आजारी होते.
अनंतराव थोपटे यांच्या निधनाने राज्याच्या राजकीय, सामाजिक आणि शैक्षणिक क्षेत्रात हळहळ व्यक्त होत असून पुणे जिल्ह्यासह भोर, वेल्हा आणि मुळशी परिसरात शोककळा पसरली आहे.
अनंतराव थोपटे यांनी आपल्या प्रदीर्घ राजकीय कारकिर्दीत महाराष्ट्राच्या मंत्रिमंडळात तब्बल १४ वर्षे मंत्री म्हणून काम केले. शिक्षणमंत्री म्हणून त्यांनी राज्याच्या शैक्षणिक विकासासाठी महत्त्वपूर्ण योगदान दिले. तसेच भोर विधानसभा मतदारसंघाचे सलग पाच वेळा प्रतिनिधित्व करत तब्बल २५ वर्षे आमदार म्हणून जनतेची सेवा केली.
भोर तालुक्याच्या विकासात त्यांचे योगदान मोलाचे मानले जाते. सर्वसामान्य कार्यकर्त्यांशी असलेला जिव्हाळा, जनतेशी थेट संवाद आणि विकासाभिमुख राजकारण ही त्यांच्या कार्यशैलीची वैशिष्ट्ये होती. पक्षीय राजकारणाच्या पलीकडे जाऊन समाजहितासाठी कार्य करणारे नेतृत्व म्हणून त्यांची ओळख होती.
त्यांच्या निधनाची वार्ता समजताच विविध राजकीय पक्षांचे नेते, पदाधिकारी, कार्यकर्ते तसेच नागरिकांनी दुःख व्यक्त केले. अनेकांनी त्यांना श्रद्धांजली अर्पण करत त्यांच्या कार्याची आठवण जागवली.
अनंतराव थोपटे यांच्या निधनाने महाराष्ट्राने एक अनुभवी, संयमी आणि लोकाभिमुख नेतृत्व गमावल्याची भावना सर्व स्तरांतून व्यक्त केली जात आहे. त्यांच्या पश्चात कुटुंबीय, असंख्य कार्यकर्ते आणि मोठा चाहतावर्ग असा परिवार आहे. त्यांच्या निधनामुळे भोर तालुक्यासह संपूर्ण पुणे जिल्ह्यावर शोककळा पसरली आहे.
