मारेगाव | प्रतिनिधी :
मारेगाव पोलीस स्टेशन हद्दीतील मार्डा डॅम परिसरात एका अज्ञात युवकाचा मृतदेह आढळून आल्याने परिसरात खळबळ उडाली आहे. मृतदेह कुजलेल्या अवस्थेत असल्याने त्याची ओळख अद्याप पटू शकलेली नाही.
घटनेची माहिती मिळताच मारेगाव पोलिसांनी तातडीने घटनास्थळी धाव घेत पंचनामा करून मृतदेह ताब्यात घेतला. त्यानंतर शवविच्छेदनासाठी मृतदेह ग्रामीण रुग्णालय, मारेगाव येथे पाठविण्यात आला.
मिळालेल्या प्राथमिक माहितीनुसार, मृत युवकाने लाल रंगाचा टी-शर्ट परिधान केला होता. मृतदेहाची अवस्था पाहता मृत्यू होऊन किमान तीन ते चार दिवस उलटले असावेत, असा प्राथमिक अंदाज व्यक्त करण्यात येत आहे. चेहरा पूर्णपणे ओळखू न येण्याच्या स्थितीत असल्याने मृताची ओळख पटविण्यात अडचणी येत आहेत.
या प्रकरणात मृत्यूचे नेमके कारण अद्याप स्पष्ट झाले नसून हा नैसर्गिक मृत्यू आहे की घातपात, याबाबत विविध तर्कवितर्क लावले जात आहेत. संबंधित युवकाचा मृत्यू घटनास्थळीच झाला की अन्यत्र घडलेल्या घटनेनंतर मृतदेह येथे आणून टाकण्यात आला, याचाही तपास पोलीस करीत आहेत.
घटनास्थळावरील परिस्थिती आणि मृतदेहाची अवस्था यामुळे परिसरात चर्चांना उधाण आले असून पोलिसांनी सर्व शक्यता गृहीत धरून तपास सुरू केला आहे.
या प्रकरणाचा पुढील तपास पोलीस निरीक्षक शाम वानखेडे यांच्या मार्गदर्शनाखाली मारेगाव पोलीस पथक करीत आहे. मृताची ओळख पटविण्यासाठी पोलिसांकडून आवश्यक प्रयत्न सुरू असून शवविच्छेदन अहवालानंतर मृत्यूचे नेमके कारण स्पष्ट होण्याची शक्यता आहे.
