शेणगाव | प्रतिनिधी
श्री मौनी विद्यापीठ संचलित कुमार भवन, शेणगाव येथे ५ जून रोजी जागतिक पर्यावरण दिन उत्साहात साजरा करण्यात आला. सामाजिक वनीकरण विभाग आणि हरित सेना यांच्या संयुक्त विद्यमाने आयोजित करण्यात आलेल्या या उपक्रमात विविध देशी वृक्षांची लागवड करून पर्यावरण संवर्धनाचा संदेश देण्यात आला.
यावेळी चिंच, करंज, उंबर, जांभूळ आणि कडुलिंब यांसारख्या देशी वृक्षांचे रोपण करण्यात आले. विद्यार्थ्यांमध्ये पर्यावरण संवर्धनाबाबत जागरूकता निर्माण करण्याच्या उद्देशाने हा उपक्रम राबविण्यात आला.
कार्यक्रमात सामाजिक वनीकरण विभागाचे रेन फॉरेस्ट ऑफिसर श्री खेतलसो यांनी विद्यार्थ्यांना पर्यावरण रक्षणाचे महत्त्व पटवून दिले. तसेच प्रशालेत राबविण्यात येणाऱ्या विविध पर्यावरणपूरक उपक्रमांची माहिती घेऊन त्यांनी संस्थेचे कौतुक केले.
प्रशालेत सीडबॉल तयार करणे, दरवर्षी वृक्षलागवड करणे, वनराई बंधारे उभारणे, ‘एक पेड माँ के नाम’ अंतर्गत विद्यार्थ्यांच्या मातांना वृक्ष वाटप करणे तसेच प्लास्टिकमुक्तीबाबत जनजागृती करणे असे विविध उपक्रम सातत्याने राबविले जात असल्याचे यावेळी सांगण्यात आले.
या कार्यक्रमाला कुमार भवनचे मुख्याध्यापक अनिल कामत, सौ. शिंदे मॅडम, येरुडकर मॅडम, सावर्दे मॅडम, कांबळे मॅडम, श्री पाटील, हरित सेना विभाग प्रमुख शरद पाटील, कोतमिरे मॅडम, पी. एम. मेंगाणे तसेच इयत्ता दहावीचे विद्यार्थी उपस्थित होते.
याशिवाय अंगणवाडी सेविका शुभांगी हावळ, वंदना जाधव, वैजयंती खराडे, कविता कुरणे, रंजना कुंभार, कविता पवार, सुनिता चेटके आणि पूजा सणगर यांनीही कार्यक्रमात सहभाग घेतला.
कार्यक्रमाच्या यशस्वी आयोजनासाठी जीवन शिक्षण मंदिर, शेणगावचे मुख्याध्यापक राजू शिंदे व शिंदे मॅडम यांचे सहकार्य लाभले.
वृक्षारोपणासह पर्यावरण संवर्धनाची सामूहिक जबाबदारी स्वीकारण्याचा संकल्प उपस्थितांनी यावेळी केला. “वृक्ष लावा, वृक्ष जगवा” हा संदेश देत कार्यक्रमाची सांगता करण्यात आली.
