वर्धा | प्रतिनिधी
जिल्ह्यात अवैध दारूविक्रीविरोधात सुरू असलेल्या विशेष मोहिमेअंतर्गत रामनगर पोलीस स्टेशनच्या दारूबंदी पथकाने दोन वेगवेगळ्या कारवायांमध्ये तिघांना अटक करून एकूण २७ हजार २५० रुपयांचा मुद्देमाल जप्त केला आहे. या प्रकरणी संबंधित आरोपींविरुद्ध गुन्हे दाखल करण्यात आले असून पुढील न्यायालयीन प्रक्रिया सुरू आहे.
पोद्दार बगीचा परिसरात धाड
दिनांक ५ जून २०२६ रोजी गुप्त माहितीच्या आधारे दारूबंदी पथकाने रामनगर येथील पोद्दार बगीचा परिसरात धाड टाकली. या कारवाईत राजू स्वामीनारायण जयस्वाल (वय ५४) आणि विकास सुधीर खोब्रागडे (वय ३६) या दोघांना ताब्यात घेण्यात आले.
आरोपींकडून देशी-विदेशी दारू तसेच बिअरचा साठा जप्त करण्यात आला असून त्याची किंमत १९ हजार ५५० रुपये इतकी आहे. या प्रकरणी रामनगर पोलीस ठाण्यात अपराध क्रमांक ५४१/२०२६ अन्वये महाराष्ट्र दारूबंदी कायद्याच्या कलम ६५(ई), ७७(अ) व ८३ अंतर्गत गुन्हा दाखल करण्यात आला आहे.
इंदिरानगरमध्ये कोम्बिंग ऑपरेशनदरम्यान कारवाई
दिनांक ६ जून २०२६ रोजी रामनगर पोलीस हद्दीत राबविण्यात आलेल्या कोम्बिंग ऑपरेशनदरम्यान दारूबंदी पथकाने इंदिरानगर, आदिवासी कॉलनी परिसरात धाड टाकली. यावेळी शुभम दरोकार याच्या घराची झडती घेतली असता देशी-विदेशी दारू व बिअरचा साठा आढळून आला.
या कारवाईत ७ हजार ७०० रुपयांचा मुद्देमाल जप्त करण्यात आला असून आरोपीविरुद्ध अपराध क्रमांक ५४५/२०२६ अन्वये महाराष्ट्र दारूबंदी कायद्याच्या कलम ६५(ई) व ७७(अ) अंतर्गत गुन्हा नोंद करण्यात आला आहे.
वरिष्ठांच्या मार्गदर्शनाखाली यशस्वी कारवाई
ही धडक कारवाई पोलीस अधीक्षक वर्धा आणि अपर पोलीस अधीक्षक वर्धा यांच्या मार्गदर्शनाखाली रामनगर पोलीस स्टेशनच्या पोलीस निरीक्षक राखोंडे मॅडम यांच्या नेतृत्वात पार पडली. दारूबंदी पथकातील पोलीस हवालदार अवी बनसोड, मुकेश वांदिले, मनोज भोमले आणि विक्की अनेराव यांनी कारवाई यशस्वी करण्यासाठी विशेष योगदान दिले.
अवैध दारूविक्रीविरोधातील अशा कारवाया पुढेही सुरू राहणार असल्याचे पोलिसांकडून सांगण्यात आले आहे.
