मोहोळ | प्रतिनिधी
राज्यात दूध व अन्न भेसळीविरोधात सुरू असलेल्या कठोर कारवायांमुळे भेसळखोरांमध्ये भीतीचे वातावरण निर्माण झाल्याची चर्चा आहे. अन्न व औषध प्रशासनाचे आयुक्त तुकाराम मुंढे यांच्या नेतृत्वाखाली सुरू असलेल्या धडक मोहिमेमुळे अनेक ठिकाणी तपासणी आणि कारवाया वेगाने सुरू आहेत. याच पार्श्वभूमीवर मोहोळ तालुक्यात एक धक्कादायक प्रकार समोर आल्याची चर्चा रंगली आहे.
मिळालेल्या माहितीनुसार, मोहोळ एमआयडीसी परिसरातील कॅनॉलमध्ये मध्यरात्रीच्या सुमारास सुमारे १२ हजार लिटर संशयित दूध असलेला टँकर रिकामा करण्यात आल्याची चर्चा नागरिकांमध्ये सुरू आहे. या घटनेमुळे परिसरात खळबळ उडाली असून, संबंधित दूध भेसळयुक्त होते का, तसेच संभाव्य कारवाईच्या भीतीने पुरावे नष्ट करण्याचा प्रयत्न करण्यात आला का, याबाबत विविध तर्क-वितर्क लावले जात आहेत.
घटनेबाबत अद्याप कोणतीही अधिकृत पुष्टी किंवा शासकीय अहवाल समोर आलेला नाही. मात्र, मोठ्या प्रमाणात दूध कॅनॉलमध्ये टाकल्याच्या चर्चेमुळे नागरिकांमध्ये संभ्रमाचे वातावरण निर्माण झाले आहे. जर ही घटना खरी असेल, तर अन्नसुरक्षा आणि पर्यावरण या दोन्ही दृष्टीने हा गंभीर विषय असल्याचे मत व्यक्त होत आहे.
दरम्यान, संबंधित प्रकरणाची सखोल चौकशी करून वस्तुस्थिती समोर आणावी आणि दोषी आढळणाऱ्यांवर कठोर कारवाई करावी, अशी मागणी स्थानिक नागरिकांकडून करण्यात येत आहे.
टीप : या वृत्तातील काही माहिती स्थानिक चर्चांवर आधारित असून संबंधित यंत्रणांकडून अधिकृत पुष्टी होणे बाकी आहे. चौकशीनंतरच घटनेचे नेमके स्वरूप स्पष्ट होणार आहे.
