रत्नागिरी | प्रतिनिधी
बेंगळुरू पोलीस व सीबीआय अधिकारी असल्याचे भासवून ‘डिजिटल अरेस्ट’ची भीती दाखवत तब्बल ₹१ कोटी २३ लाख रुपयांची फसवणूक केल्याप्रकरणी दिल्लीतील एका आरोपीला रत्नागिरी सायबर पोलिसांनी अटक केली आहे.
मिळालेल्या माहितीनुसार, आरोपी व त्याच्या साथीदारांनी फिर्यादी यांना संपर्क साधून त्यांच्या कॅनरा बँक, माटुंगा (मुंबई) येथील खात्यातून सुमारे ₹३ कोटी रुपयांचा संशयित आर्थिक गैरव्यवहार झाल्याचा बनाव रचला. त्यानंतर त्यांना ‘डिजिटल अरेस्ट’ करण्यात आल्याची भीती दाखवून चौकशीच्या नावाखाली वारंवार पैसे भरण्यास भाग पाडले.
दि. ४ नोव्हेंबर २०२५ ते १९ जानेवारी २०२६ या कालावधीत फिर्यादींकडून विविध व्यवहारांद्वारे एकूण ₹१,२३,००,००० इतकी रक्कम उकळण्यात आली.
तक्रारीनंतर रत्नागिरी सायबर पोलीस ठाण्यात गुन्हा क्रमांक ०२/२०२६ नोंदविण्यात आला असून भारतीय न्याय संहिता २०२३ च्या कलम ३१८(२), ३१८(४), ३१९(२), ३(५) तसेच माहिती तंत्रज्ञान अधिनियम २००० च्या कलम ६६(डी) अंतर्गत गुन्हा दाखल करण्यात आला आहे.
सायबर पोलीस ठाण्याच्या तपास पथकाने तांत्रिक विश्लेषण व आर्थिक व्यवहारांचा मागोवा घेत दिल्ली–नोएडा येथून आरोपी गगनदीप भारद्वाज याला ताब्यात घेतले. न्यायालयाने त्याला चार दिवसांची पोलीस कोठडी सुनावली आहे.
ही कारवाई पोलीस अधीक्षक नितीन बगाटे व अपर पोलीस अधीक्षक बी. बी. महामुनी यांच्या मार्गदर्शनाखाली करण्यात आली. तपासात प्रभारी अधिकारी स्मिता सुतार, सहायक पोलीस निरीक्षक तुषार जाधव, पोलीस हवालदार संदीप नाईक व पोलीस कॉन्स्टेबल सौरभ कदम यांनी महत्त्वाची भूमिका बजावली.
