रांजणगाव MIDC | प्रतिनिधी
रांजणगाव एमआयडीसी येथील डंकन इंजिनिअरिंग लिमिटेडमध्ये कार्यरत असलेले सचिन जाधव यांना “HR Excellence Award 2026” अंतर्गत “Best HR Manager 2026” या प्रतिष्ठित पुरस्काराने सन्मानित करण्यात आले आहे.
हा पुरस्कार अदानी उद्योग समूहाचे उपाध्यक्ष अमिताभ मिश्रा यांच्या हस्ते प्रदान करण्यात आला. तसेच भारतीय पोलीस सेवेतील ‘Ironman’ म्हणून ओळखले जाणारे आयपीएस अधिकारी कृष्ण प्रकाश यांच्याशी संवाद साधण्याची संधी मिळणे हेही त्यांच्या कारकिर्दीतील महत्त्वपूर्ण व प्रेरणादायी क्षण ठरले.
मानव संसाधन व्यवस्थापन क्षेत्रातील कार्यासोबतच सचिन जाधव यांनी सामाजिक उत्तरदायित्व (CSR) उपक्रमांमध्येही उल्लेखनीय योगदान दिले आहे. शिरूर व परिसरातील विविध सामाजिक उपक्रमांमध्ये त्यांचा सक्रिय सहभाग राहिला आहे.
त्यामध्ये शिरूर येथील आश्रमशाळेला किराणा साहित्य वाटप, टाकळी हाजी परिसरातील दिव्यांग विद्यार्थ्यांच्या शाळेला मदत, कोंढापुरी येथील मागासवर्गीय निवासी शाळेला शैक्षणिक साहित्य पुरवठा, कारेगाव जिल्हा परिषद शाळेतील विद्यार्थ्यांना गणवेश व शालेय साहित्य वाटप तसेच व्हिजन हॉस्पिटलच्या माध्यमातून मोतीबिंदू शस्त्रक्रिया शिबिरांचे आयोजन अशा अनेक उपक्रमांचा समावेश आहे.
शिरूर ग्रामीण भागातील CSR प्रकल्प सध्या प्रगतीपथावर असून शिक्षण, आरोग्य व सामाजिक विकासासाठी सातत्याने प्रयत्न सुरू आहेत.
रांजणगाव इंडस्ट्रियल असोसिएशनचे सदस्य म्हणून सचिन जाधव यांनी उद्योग, पोलीस प्रशासन, एमआयडीसी अधिकारी, लोकप्रतिनिधी व सामाजिक घटक यांच्यात समन्वय साधण्याचे महत्त्वपूर्ण कार्य केले आहे. तसेच कामगार संघटनांमधील प्रश्न व औद्योगिक वाद सोडवून औद्योगिक शांतता व सौहार्द टिकविण्यातही त्यांचे योगदान महत्त्वाचे ठरले आहे.
या पुरस्कारामुळे त्यांच्या वैयक्तिक कामगिरीबरोबरच शिरूर परिसरातील सामाजिक व औद्योगिक विकासालाही अधोरेखित मान्यता मिळाली आहे.
