शिरूर | प्रतिनिधी
बालकांमध्ये संस्कार, शिस्त, आत्मविश्वास आणि सामाजिक जाणीवा रुजविण्याच्या उद्देशाने प्रभाग क्रमांक २ मध्ये आयोजित करण्यात आलेले सात दिवसीय बाल संस्कार शिबिर उत्साहपूर्ण वातावरणात यशस्वीरीत्या पार पडले. नगरसेविका स्वप्नालीताई योगेश जामदार मित्र मंडळाच्या वतीने १ जून ते ७ जून या कालावधीत या शिबिराचे आयोजन करण्यात आले होते.
शिबिरामध्ये विद्यार्थ्यांसाठी श्लोक, प्रार्थना, स्तोत्र पठण, सूर्यनमस्कार तसेच ‘गुड टच-बॅड टच’ या विषयावर शिरूर संवादिनी यांच्या माध्यमातून मार्गदर्शन करण्यात आले. योगगुरू विनायक पोटे व लोखंडे सर यांनी योगासनांचे प्रशिक्षण दिले. कराटे प्रशिक्षण सुदाम राखुडे, चित्रकला व हस्ताक्षर प्रशिक्षण संदीप वेताळ, अबॅकस प्रशिक्षण प्रतिभा पुजारी यांनी दिले. तसेच ओंकार संगीत विद्यालय, शिरूर यांच्या वतीने तबला व पेटीचे प्रशिक्षण देण्यात आले.
शिबिरादरम्यान डॉ. मोनिका धापटे-धुमाळ यांनी विद्यार्थ्यांची दंत तपासणी तर डॉ. साळुंके यांनी नेत्र तपासणी केली. मुलांच्या सर्वांगीण विकासासाठी उपयुक्त ठरणारे विविध उपक्रम या शिबिरात राबविण्यात आले. शिबिर पूर्ण केलेल्या १०८ विद्यार्थ्यांना सहभाग प्रमाणपत्र देऊन गौरविण्यात आले.
या उपक्रमात दररोज विद्यार्थ्यांना खाऊचे वाटप करण्यात आले. हा उपक्रम मच्छिंद्रशेठ जामदार यांच्या वतीने राबविण्यात आला. शिबिराच्या यशस्वी आयोजनासाठी चेतन जामदार, भरत कालेवार, विजय शिर्के, सागर शिर्के, संजय कडेकर आणि राजेंद्र गोरडे यांचे विशेष सहकार्य लाभले. समारोप कार्यक्रमास नगराध्यक्षा ऐश्वर्याताई पाचर्णे, सभापती डॉ. सुनिताताई पोटे, उपसभापती स्वप्नालीताई जामदार, रवींद्र धनक, नगरसेवक अमोल चव्हाण, नगरसेवक गणेश कोळपकर, मच्छिंद्र जामदार, पाटील मॅडम, डॉ. वैशाली साखरे, लोखंडे मॅडम, शशिकला काळे यांच्यासह अनेक पालक उपस्थित होते.
यावेळी बोलताना नगराध्यक्षा ऐश्वर्याताई पाचर्णे यांनी अशा बाल संस्कार शिबिरांची समाजाला मोठी गरज असल्याचे सांगितले. त्यांनी प्रभागातील हा उपक्रम समाजहिताचा असल्याचे नमूद केले. रवींद्र धनक यांनी पालकांनी स्वतः आदर्श आचरण ठेवणे आवश्यक असल्याचे मत व्यक्त केले. डॉ. सुनिताताई पोटे यांनी या उपक्रमाचे कौतुक करत भावी पिढी घडविण्यासाठी तो महत्त्वपूर्ण असल्याचे सांगितले.
नगरसेवक अमोल चव्हाण यांनी अशा शिबिरांचे आयोजन सर्व प्रभागांमध्ये व्हावे अशी अपेक्षा व्यक्त केली. गणेश कोळपकर यांनीही शिबिराचे कौतुक केले. यापुढे प्रत्येक रविवारी बाल संस्कार वर्ग नियमितपणे सुरू ठेवण्यात येणार असल्याची माहिती योगेश जामदार यांनी दिली.
कार्यक्रमाचे सूत्रसंचालन डॉ. वैशाली साखरे यांनी केले. प्रास्ताविक योगेश जामदार यांनी केले तर आभार प्रदर्शन नगरसेविका स्वप्नालीताई योगेश जामदार यांनी केले.
