दापोली | प्रतिनिधी
स्वराज्य ग्रुप, वसई यांच्या वतीने आयोजित करण्यात आलेल्या प्रथम वर्षाच्या खो-खो स्पर्धेत “विनय स्पोर्ट्स नालासोपारा” संघाने उत्कृष्ट खेळाचे प्रदर्शन करत विजेतेपद पटकावले. दिनांक ६ व ७ जून रोजी झालेल्या या स्पर्धेत संघातील खेळाडूंनी दमदार कामगिरी करून प्रतिस्पर्ध्यांवर मात केली.
या विजेत्या संघात दापोली तालुक्यातील आंबवली बुद्रुक (ता. दापोली, पोस्ट – केळशी) येथील कु. निषीध आमडस्कर यांचा समावेश होता. निषीध यांनी संपूर्ण स्पर्धेदरम्यान चपळ, आक्रमक आणि प्रभावी खेळाचे प्रदर्शन करत संघाच्या विजयात महत्त्वपूर्ण योगदान दिले. त्यांच्या उल्लेखनीय कामगिरीमुळे दापोली तालुक्याच्या क्रीडा क्षेत्रात अभिमानाची भर पडली आहे.
कु. निषीध आमडस्कर हे श्री काळेश्वरी क्रीडा मंडळ, आंबवली बुद्रुकचे अध्यक्ष सचिन आमडस्कर यांचे सुपुत्र आहेत. त्यांच्या या यशामुळे आंबवली बुद्रुक, केळशी परिसरासह संपूर्ण दापोली तालुक्यात आनंदाचे वातावरण निर्माण झाले आहे.
श्री काळेश्वरी क्रीडा मंडळाच्या वतीने निषीध आमडस्कर यांचे मनःपूर्वक अभिनंदन करण्यात आले असून त्यांच्या भावी क्रीडा कारकिर्दीसाठी शुभेच्छा देण्यात आल्या आहेत. ग्रामीण भागातील खेळाडूंनी राज्य व राष्ट्रीय स्तरावर यश संपादन करून आपल्या गावाचे आणि तालुक्याचे नाव उज्ज्वल करावे, अशी अपेक्षा यावेळी व्यक्त करण्यात आली.
निषीध आमडस्कर यांच्या यशामुळे ग्रामीण भागातील युवा खेळाडूंना नवी प्रेरणा मिळाली असून त्यांच्या पुढील वाटचालीकडे क्रीडाप्रेमींचे लक्ष लागले आहे.
