रत्नागिरी | प्रतिनिधी
आकाशवाणी रत्नागिरी केंद्राच्या लोकप्रिय ‘कोकण दर्शन’ या कार्यक्रमातून यावेळी कोकणातील प्रसिद्ध तीर्थक्षेत्र गणपतीपुळे आणि तेथील सागरी पर्यटनाची विशेष सफर श्रोत्यांना अनुभवता येणार आहे. हा विशेष कार्यक्रम १२ जून रोजी सकाळी ८.४० वाजता प्रसारित होणार आहे.
‘कोकण दर्शन’ ही मालिका दर शुक्रवारी आकाशवाणी रत्नागिरीवरून प्रसारित केली जाते. या भागामध्ये गणपतीपुळे येथील श्री गणपती मंदिराचा इतिहास, धार्मिक परंपरा, विविध उत्सव, डोंगर प्रदक्षिणा तसेच ग्रामदैवत चंडिका देवी मंदिराची माहिती श्रोत्यांना मिळणार आहे.
गणपतीपुळेचा निसर्गरम्य समुद्रकिनारा आणि तेथील पर्यटन वैशिष्ट्ये यांचाही कार्यक्रमात समावेश करण्यात आला आहे. समुद्रस्नान करताना घ्यावयाची काळजी, सुरक्षिततेचे नियम आणि पर्यटकांनी पाळावयाच्या सूचना याबाबत महत्त्वपूर्ण मार्गदर्शनही या कार्यक्रमातून केले जाणार आहे.
कार्यक्रमात संस्थान श्री गणपतीपुळेचे अध्यक्ष श्री. निलेश कोल्हटकर, स्थानिक भाविक सौ. पद्मजा कुमार जोशी तसेच जीवरक्षक उमेश महाद्ये यांचा सहभाग असून त्यांनी गणपतीपुळेच्या धार्मिक, सांस्कृतिक आणि पर्यटनविषयक पैलूंवर प्रकाश टाकला आहे.
या कार्यक्रमाचे लेखन सौ. सोनाली संदेश सावंत यांनी केले असून निवेदन व निर्मिती सहाय्य सौ. सोनाली संदेश सावंत आणि सौ. वंदना आशिष मुसळे यांनी केले आहे. कार्यक्रमाचे सादरीकरण विवेक वानखडे करणार आहेत.
हा कार्यक्रम मध्यम लहरी 1143 किलोहर्ट्झ, एफएम 101.5 मेगाहर्ट्झ तसेच ‘न्यूज ऑन एअर’ या मोबाईल ॲपवर ऐकता येणार आहे. प्रसारणानंतर कार्यक्रम ‘AIR Ratnagiri 1248’ या यूट्यूब चॅनलवरही उपलब्ध होणार आहे.
रत्नागिरी जिल्ह्याच्या पर्यटन, संस्कृती आणि धार्मिक वारशाची ओळख करून देणारा हा विशेष कार्यक्रम श्रोत्यांसाठी माहितीपूर्ण आणि आकर्षक ठरणार असून सर्वांनी तो आवर्जून ऐकावा, असे आवाहन आकाशवाणी रत्नागिरी केंद्राकडून करण्यात आले आहे.
