पलूस | प्रतिनिधी
महाराष्ट्र राज्य वारकरी मंचाचे सांगली जिल्हाध्यक्ष तथा विविध सामाजिक क्षेत्रात कार्यरत असलेले ह.भ.प. दिलीप पाटील यांना ‘आदर्श प्रवचनकार – वारकरी भूषण’ या राज्यस्तरीय पुरस्काराने सन्मानित करण्यात आले. हा पुरस्कार दि. ७ जून रोजी पैलवान सुभाष दादा पाटील युथ फाउंडेशन, कोल्हापूर यांच्या वतीने प्रदान करण्यात आला.
वारकरी संप्रदायात अनेक वर्षे सातत्याने केलेल्या कार्याची दखल घेत ह.भ.प. दिलीप पाटील यांना हा सन्मान देण्यात आला असल्याची माहिती संस्थेचे संस्थापक पैलवान सुभाष दादा पाटील यांनी दिली.
ह.भ.प. दिलीप पाटील हे महाराष्ट्र राज्य वारकरी मंचाचे सांगली जिल्हाध्यक्ष असून लोकहित माहिती अधिकार पत्रकार व पोलीस संरक्षण संघटनेचे महाराष्ट्र प्रदेशाध्यक्ष म्हणूनही कार्यरत आहेत. तसेच ते पोलीस मित्र गुन्हे नियंत्रण संघटनेचे सांगली जिल्हा उपाध्यक्ष आणि सारथी महाराष्ट्र न्यूजचे तालुका प्रतिनिधी म्हणून पत्रकारितेच्या क्षेत्रातही कार्य करीत आहेत.
वारकरी संप्रदायामध्ये प्रवचन, कीर्तन, ज्ञानेश्वरी पारायण तसेच अध्यात्मिक जनजागृतीचे विविध उपक्रम राबविण्यात त्यांचे मोलाचे योगदान आहे. सामाजिक, धार्मिक आणि पत्रकारिता क्षेत्रातील उल्लेखनीय कार्यामुळे त्यांना यापूर्वीही अनेक राज्यस्तरीय पुरस्कारांनी गौरविण्यात आले आहे.
पुरस्कार वितरण सोहळ्यात विविध क्षेत्रातील मान्यवर उपस्थित होते. त्यांच्या हस्ते ह.भ.प. दिलीप पाटील यांचा सन्मान करण्यात आला. पुरस्कार प्राप्त झाल्यानंतर त्यांच्यावर अभिनंदनाचा वर्षाव होत असून विविध स्तरांतून शुभेच्छा दिल्या जात आहेत.
यावेळी ह.भ.प. शांताराम महाराज वडगाव हवेली यांनी शुभेच्छा देत पुढील सामाजिक व आध्यात्मिक वाटचालीसाठी आशीर्वाद दिले. तसेच ह.भ.प. किशोर महाराज जाधव, ह.भ.प. निरंजन महाराज कुंभार, ह.भ.प. सुधीर महाराज काली आणि ह.भ.प. सुरेंद्रनाथ कणसे यांची प्रमुख उपस्थिती होती.
ह.भ.प. दिलीप पाटील यांच्या या यशामुळे वारकरी संप्रदायासह सामाजिक क्षेत्रात आनंदाचे वातावरण निर्माण झाले आहे.
