चंदगड | प्रतिनिधी
ऐतिहासिक वारसा, निसर्ग संवर्धन आणि ग्रामीण पर्यटनाला चालना देणाऱ्या “पारगड हेरिटेज रन” मॅरेथॉन स्पर्धेला किल्ले पारगडाच्या निसर्गरम्य वातावरणात उत्साहपूर्ण प्रतिसाद मिळाला. चंदगड विधानसभा मतदारसंघाचे आमदार शिवाजीराव पाटील यांच्या हस्ते स्पर्धेचे उद्घाटन करण्यात आले. महाराष्ट्रासह देशातील विविध राज्यांतील धावपटूंनी या स्पर्धेत सहभागी होत इतिहास आणि साहसाचा अनोखा अनुभव घेतला.
स्पर्धेच्या उद्घाटनप्रसंगी आमदार शिवाजीराव पाटील यांनी सांगितले की, “पारगड हेरिटेज रन ही केवळ मॅरेथॉन स्पर्धा नसून छत्रपती शिवाजी महाराजांचा गौरवशाली इतिहास, चंदगड तालुक्याची समृद्ध निसर्गसंपदा आणि ग्रामीण पर्यटनाची ताकद देशासमोर मांडणारा प्रभावी उपक्रम आहे.”
दुर्गम डोंगराळ भागात अशा दर्जेदार आणि शिस्तबद्ध स्पर्धेचे यशस्वी आयोजन केल्याबद्दल त्यांनी Outplay Sports टीमचे विशेष कौतुक केले.
आरोग्य आणि पर्यावरण संवर्धनाचा संदेश
“एक धाव निसर्ग संवर्धनासाठी” हा संदेश देणाऱ्या या स्पर्धेमुळे युवकांमध्ये आरोग्य, साहस आणि पर्यावरण संवर्धनाबाबत जागरूकता निर्माण होत असल्याचे मत व्यक्त करण्यात आले. पारगड आणि चंदगड परिसरातील गड-किल्ले, सांस्कृतिक वारसा आणि पर्यटनस्थळांना राष्ट्रीय स्तरावर ओळख मिळवून देण्यासाठी अशा उपक्रमांची महत्त्वपूर्ण भूमिका असल्याचे मान्यवरांनी नमूद केले.
पुढील वर्षासाठी मोठी घोषणा
स्पर्धेचे वाढते महत्त्व लक्षात घेऊन आमदार शिवाजीराव पाटील यांनी पुढील वर्षी ही स्पर्धा अधिक भव्य स्वरूपात आयोजित करण्यासाठी २५ लाख रुपयांचा निधी उपलब्ध करून देण्याची घोषणा केली. तसेच आगामी स्पर्धेतील विजेत्यासाठी ₹१,११,१११ चे आकर्षक बक्षीस जाहीर करण्यात आले. या घोषणेमुळे धावपटू, शिवप्रेमी आणि पर्यटन क्षेत्रातील नागरिकांमध्ये उत्साहाचे वातावरण निर्माण झाले आहे.
मान्यवरांची उपस्थिती
या कार्यक्रमाला बिपीन चिरमुरे, राजेश पाटील, राजश्री गावडे, सुवर्णा कुंभार, राजेश चव्हाण, ऋषीकेश शेळके, निंगापा चौखंडे आणि सुनिल काणेकर यांच्यासह अनेक मान्यवर उपस्थित होते.
याशिवाय उपनगराध्यक्षा आयेशा नायकवाडी, उद्योगपती लक्ष्मण गावडे, अशोक पांडव, सुनिल मालुसरे, विशाल बल्लाळ, अभिजीत गुरबे, अमेय सबनीस, सरपंच तुकाराम सुतार, प्रवीण चिरमुरे, नगरसेवक अबुझर मदार, नगरसेविका शीतल कट्टी, दत्तात्रेय पाटील तसेच शेकडो स्पर्धक, शिवप्रेमी, आजी-माजी सैनिक आणि स्थानिक ग्रामस्थ मोठ्या संख्येने उपस्थित होते.
या स्पर्धेमुळे किल्ले पारगड परिसरात उत्साहाचे आणि पर्यटनवृद्धीचे वातावरण निर्माण झाले असून स्थानिक व्यवसायांना देखील याचा मोठा लाभ होण्याची अपेक्षा व्यक्त केली जात आहे.
