मारेगाव | प्रतिनिधी :
मारेगाव तालुक्यातील कोसारा गावात सुरू असलेल्या अवैध दारू विक्रीविरोधात मारेगाव पोलिसांनी धडक कारवाई करत दोन जणांविरुद्ध गुन्हा दाखल केला आहे. या कारवाईत मोठ्या प्रमाणात देशी दारूच्या बाटल्या जप्त करण्यात आल्या असून अवैध व्यवसाय करणाऱ्यांमध्ये खळबळ उडाली आहे.
मिळालेल्या माहितीनुसार, ग्राम कोसारा येथे काही व्यक्तींकडून अवैधरित्या दारू विक्री केली जात असल्याची माहिती मारेगाव पोलीस स्टेशनला प्राप्त झाली होती. या माहितीची खातरजमा करून पोलिसांनी सापळा रचला. काही दिवस गुप्त पद्धतीने हालचालींवर लक्ष ठेवून योग्य संधी साधत पोलिसांनी छापा टाकला.
या कारवाईदरम्यान अमोल नारनवरे आणि सुलोचना नंदलाल जयस्वाल यांच्या ताब्यातून 90 मिली क्षमतेच्या तब्बल 145 दारूच्या काचेच्या बाटल्या जप्त करण्यात आल्या. जप्त करण्यात आलेल्या मुद्देमालाची किंमत अंदाजे सात ते साडेसात हजार रुपये असल्याचे समजते.
या प्रकरणी संबंधित आरोपींविरुद्ध मुंबई दारूबंदी कायद्यानुसार गुन्हा दाखल करण्यात आला असून पुढील तपास सुरू आहे.
ही कारवाई मारेगाव पोलीस ठाण्याचे पोलीस निरीक्षक शाम वानखेडे यांच्या मार्गदर्शनाखाली करण्यात आली. कारवाईत पोलीस कर्मचारी दिगंबर किनाके, बबीता तोडासे, अतुल सरोदे, शंकर बारेकर आणि नरेंद्र तुमराम यांनी सहभाग घेतला.
कारवाईनंतर मारेगाव पोलिसांनी अवैध धंदे करणाऱ्यांना कडक इशारा देत अशा प्रकारच्या बेकायदेशीर व्यवसायांवर यापुढेही सातत्याने कारवाई केली जाईल, असे स्पष्ट केले आहे. कायद्याचे उल्लंघन करणाऱ्यांविरोधात कोणतीही हयगय केली जाणार नसून अवैध दारू विक्री, जुगार, सट्टा आणि इतर बेकायदेशीर धंद्यांविरोधातील मोहीम अधिक तीव्र करण्यात येणार असल्याचे पोलिसांनी सांगितले.
या कारवाईमुळे कोसारा परिसरातील अवैध दारू विक्रेत्यांमध्ये भीतीचे वातावरण निर्माण झाले असून स्थानिक नागरिकांनी पोलिसांच्या या धडक कारवाईचे स्वागत केले आहे.
