शहादा | प्रतिनिधी
महाराष्ट्र राज्य तंत्रशिक्षण विभागामार्फत शैक्षणिक वर्ष २०२६-२७ साठी राबविण्यात येणाऱ्या प्रथम व द्वितीय वर्ष पदविका (पॉलिटेक्निक) प्रवेश प्रक्रियेसाठी शहादा येथील पूज्य साने गुरुजी विद्या प्रसारक मंडळ संचलित जी.एम. चौधरी तंत्रनिकेतन येथे विद्यार्थ्यांसाठी मोफत सुविधा केंद्र सुरू करण्यात आले आहे. प्रवेश प्रक्रियेअंतर्गत ऑनलाईन नावनोंदणीची अंतिम मुदत २२ जून २०२६ असून विद्यार्थ्यांनी वेळेत अर्ज भरून या संधीचा लाभ घ्यावा, असे आवाहन संस्थेचे प्राचार्य बी. के. सोनी यांनी केले आहे.
दहावी, बारावी तसेच आयटीआय उत्तीर्ण विद्यार्थ्यांसाठी तंत्रशिक्षण क्षेत्रातील विविध पदविका अभ्यासक्रमांचे उत्कृष्ट पर्याय या संस्थेत उपलब्ध आहेत. प्रवेश प्रक्रिया पूर्णपणे ऑनलाईन पद्धतीने होत असून विद्यार्थ्यांना अर्ज भरताना ई-स्क्रुटिनी किंवा फिजिकल स्क्रुटिनी या दोन पर्यायांपैकी एकाची निवड करावी लागणार आहे. अर्ज भरल्यानंतर आवश्यक कागदपत्रे अपलोड करून पडताळणी प्रक्रिया पूर्ण करणे आणि नोंदणी निश्चित करणे अनिवार्य आहे.
संस्थेमध्ये प्रथम वर्ष पदविका अभ्यासक्रमासाठी पाच प्रमुख शाखांमध्ये प्रवेश सुरू असून प्रत्येक शाखेसाठी ६० जागा उपलब्ध आहेत. यामध्ये संगणक अभियांत्रिकी, आर्टिफिशियल इंटेलिजन्स, विद्युत अभियांत्रिकी, यंत्र अभियांत्रिकी आणि स्थापत्य अभियांत्रिकी या शाखांचा समावेश आहे. अशा प्रकारे एकूण २४० जागांसाठी प्रवेश प्रक्रिया राबविण्यात येत आहे.
विद्यार्थी व पालकांना प्रवेश प्रक्रियेबाबत कोणतीही अडचण येऊ नये यासाठी संस्थेने मोफत मार्गदर्शन सुविधा उपलब्ध करून दिली आहे. प्रवेशासंदर्भात अधिक माहितीसाठी प्राचार्य बी. के. सोनी (९६०४११८७११) तसेच प्रा. सौ. शितल चौधरी (७५८८५१६४३८) यांच्याशी संपर्क साधण्याचे आवाहन करण्यात आले आहे.
तंत्रशिक्षण क्षेत्रात उज्ज्वल करिअर घडवू इच्छिणाऱ्या विद्यार्थ्यांनी २२ जूनपूर्वी आपली नावनोंदणी पूर्ण करून या सुवर्णसंधीचा लाभ घ्यावा, असे आवाहन जी.एम. चौधरी तंत्रनिकेतन प्रशासनातर्फे करण्यात आले आहे.
