लोणी | प्रतिनिधी
आंबेगाव तालुक्यातील चार होतकरू युवक-युवतींनी कठोर परिश्रम, जिद्द आणि चिकाटीच्या जोरावर पोलीस उपनिरीक्षक (PSI) पदाची परीक्षा उत्तीर्ण करत पोलीस सेवेत प्रवेश केला आहे. त्यांच्या या उल्लेखनीय यशामुळे संपूर्ण तालुक्यात आनंदाचे वातावरण निर्माण झाले असून विविध स्तरांतून त्यांच्यावर अभिनंदनाचा वर्षाव होत आहे.
नुकतेच वर्षभराचे खडतर प्रशिक्षण यशस्वीरीत्या पूर्ण करून प्रशांत बबन दांगट, भाग्यश्री जगन्नाथ जाधव, श्वेता सुखदेव करंडे आणि स्वप्निल मच्छिंद्र हिंगे हे पोलीस उपनिरीक्षक म्हणून सेवेत रुजू झाले आहेत.
प्रशांत दांगट (निरगुडसर) हे पत्रकार प्रमोद दांगट यांचे बंधू आहेत. भाग्यश्री जाधव (जाधववाडी) या ज्येष्ठ पत्रकार रमेश जाधव यांच्या पुतणी आहेत. तर श्वेता करंडे (काठापूर) या पत्रकार विशाल करंडे यांच्या भगिनी असून स्वप्निल हिंगे (अवसरी बुद्रुक) हे भीमाशंकर साखर कारखान्याचे अधिकारी रामनाथ हिंगे पाटील यांचे पुतणे आहेत.
या चारही नवोदित अधिकाऱ्यांनी आपल्या कुटुंबासह आंबेगाव तालुक्याचे नाव राज्यभर उज्ज्वल केले आहे. त्यांच्या यशामुळे ग्रामीण भागातील युवक-युवतींना स्पर्धा परीक्षांमध्ये यश मिळविण्यासाठी प्रेरणा मिळणार आहे.
नाशिक येथील महाराष्ट्र पोलीस अकादमी येथे आयोजित भव्य दीक्षांत समारंभात राज्याचे सदानंद दाते यांच्या हस्ते एकूण ५८३ प्रशिक्षणार्थी पोलीस उपनिरीक्षकांना पदवी प्रदान करण्यात आली. याच समारंभात आंबेगाव तालुक्यातील या चार युवक-युवतींनी यशस्वीरीत्या प्रशिक्षण पूर्ण करून पोलीस सेवेत प्रवेश केला.
दीक्षांत समारंभात आपल्या मुलांना खाकी वर्दीत पाहताना अनेक पालकांच्या डोळ्यांत आनंदाश्रू तरळले. कुटुंब, गाव आणि तालुक्याचा गौरव वाढविणाऱ्या या नवोदित अधिकाऱ्यांचे सर्वत्र कौतुक होत आहे.
ग्रामीण भागातून पुढे आलेल्या या चारही युवक-युवतींनी जिद्द, मेहनत आणि चिकाटीच्या बळावर आपले ध्येय गाठत इतर तरुणांसमोर प्रेरणादायी आदर्श निर्माण केला आहे. जनतेची सेवा, कायदा व सुव्यवस्था राखण्याची जबाबदारी समर्थपणे पार पाडत त्यांच्या उज्ज्वल कारकिर्दीसाठी विविध क्षेत्रातील मान्यवरांनी शुभेच्छा व्यक्त केल्या आहेत.
