पनवेल-कळंबोली | प्रतिनिधी :
खारघर, कामोठे आणि कळंबोली परिसरातील मुख्य रस्ते, चौक तसेच सेवा रस्त्यांवर रात्रीच्या वेळी वाढलेल्या गैरप्रकारांना आळा घालण्यासाठी महाराष्ट्र नवनिर्माण सेनेच्या महिला सेनेने आक्रमक भूमिका घेतली आहे. मनसे महिला सेनेच्या पनवेल महानगर अध्यक्षा स्वरूपा सुर्वे यांनी नवनियुक्त पोलीस उप-आयुक्त (परिमंडळ-३) रश्मी नांदेडकर यांची सदिच्छा भेट घेऊन परिसरातील कायदा व सुव्यवस्थेच्या प्रश्नांबाबत सविस्तर चर्चा केली आणि निवेदन सादर केले.
निवेदनात खारघर, कामोठे आणि कळंबोली परिसरातील काही अंधारे भाग, मुख्य रस्ते आणि सेवा रस्त्यांवर रात्रीच्या वेळी संशयास्पद हालचाली वाढल्याचा मुद्दा उपस्थित करण्यात आला. यामुळे स्थानिक नागरिक, महिला, विद्यार्थी आणि ज्येष्ठ नागरिकांमध्ये असुरक्षिततेची भावना निर्माण होत असल्याचे मनसेच्या शिष्टमंडळाने नमूद केले.
स्वरूपा सुर्वे यांनी नागरिकांच्या सुरक्षेच्या दृष्टीने संवेदनशील भागांमध्ये पोलीस गस्त वाढविणे, संशयास्पद हालचालींवर लक्ष ठेवणे, सीसीटीव्ही यंत्रणेचा प्रभावी वापर करणे, गुप्त पथकांच्या माध्यमातून देखरेख वाढविणे आणि कायद्याचे उल्लंघन करणाऱ्यांवर कठोर कारवाई करण्याची मागणी केली.
यावेळी पोलीस उप-आयुक्त रश्मी नांदेडकर यांनी विषयाचे गांभीर्य लक्षात घेऊन संबंधित भागांमध्ये आवश्यक त्या कायदेशीर आणि प्रतिबंधात्मक उपाययोजना करण्यात येतील, असे आश्वासन दिले.
या भेटीदरम्यान मनसेचे पनवेल महानगर सचिव पराग बालड, पनवेल उपशहर अध्यक्षा साक्षी दळवी, नवीन पनवेल शहर सचिव मनीषा देशमुख, नवीन पनवेल उपशहर अध्यक्षा मानसी सकपाळ, उपशहर अध्यक्ष रोहन पाटील, हर्ष खैरे, दीपेश पोपटा यांच्यासह अनेक पदाधिकारी व कार्यकर्ते उपस्थित होते.
स्थानिक नागरिकांच्या सुरक्षिततेच्या दृष्टीने मनसेने उचललेल्या या पावलाचे परिसरात स्वागत होत असून प्रशासनाने तातडीने कारवाई करावी, अशी अपेक्षा नागरिकांकडून व्यक्त केली जात आहे.
