दोंडाईचा | प्रतिनिधी
जागतिक दृष्टीदान दिन तसेच ‘प्रविण आय क्लिनिक’च्या ३१ व्या वर्धापनदिनानिमित्त दोंडाईचा येथे आयोजित करण्यात आलेल्या भव्य मोफत नेत्र तपासणी व मोतीबिंदू शस्त्रक्रिया शिबिराला उत्स्फूर्त प्रतिसाद मिळाला. रोटरी क्लब ऑफ दोंडाईचा सिनियर्स, शंकरा आय हॉस्पिटल (आनंद) आणि प्रविण आय क्लिनिक (दोंडाईचा) यांच्या संयुक्त विद्यमाने रोटरी मार्ग येथील प्रविण आय क्लिनिकमध्ये हे शिबिर यशस्वीरीत्या पार पडले.
शिबिरात एकूण ११३ रुग्णांची नेत्र तपासणी करण्यात आली. त्यापैकी ५६ गरजू रुग्णांची मोफत मोतीबिंदू शस्त्रक्रियेसाठी निवड करण्यात आली असून पुढील उपचारासाठी त्यांना आनंद (गुजरात) येथील शंकरा आय हॉस्पिटलमध्ये पाठविण्यात आले आहे.
उद्घाटनप्रसंगी भाजपा शहराध्यक्ष जितेंद्र गिरासे यांनी प्रविण आय क्लिनिकच्या गेल्या तीन दशकांतील कार्याचा गौरव करत सांगितले की, हजारो रुग्णांवर मोफत व यशस्वी नेत्रशस्त्रक्रिया करून संस्थेने समाजसेवेचा आदर्श निर्माण केला आहे. दोंडाईचासह धुळे, नंदुरबार, जळगाव आणि नाशिक जिल्ह्यातील रुग्णांचा या सेवेला मोठा प्रतिसाद मिळत असल्याचे त्यांनी नमूद केले.
यावेळी महाराष्ट्र राज्याचे पणन व राजशिष्टाचार मंत्री ना. जयकुमार रावल यांच्या वतीने तसेच दोंडाईचा शहरातील नागरिकांतर्फे नेत्र तंत्रज्ञ प्रविण महाजन यांना ३१ व्या वर्धापनदिनानिमित्त शुभेच्छा देण्यात आल्या. बांधकाम सभापती मुकेश देवरे यांनीही संस्थेच्या सामाजिक कार्याचे कौतुक केले.
शिबिरात आलेल्या सर्व रुग्णांची तपासणी, औषधोपचार तसेच राहण्याची व जेवणाची व्यवस्था पूर्णपणे मोफत करण्यात आली होती. नेत्र तंत्रज्ञ प्रविण महाजन यांनी स्वतः रुग्णांची सखोल तपासणी करून मार्गदर्शन केले.
या प्रसंगी रोटरी सिनियर्सचे अध्यक्ष प्रविण महाजन, भाजपा शहराध्यक्ष जितेंद्र गिरासे, बांधकाम सभापती मुकेश देवरे, नगरसेवक हितेंद्र महाले, कृष्णा नगराळे, जितू गिरासे, चतुर पाटील, नरेंद्र कोळी, महेंद्र बाबा कोळी, प्रशांत कागणे, हेमंत जाधव, मुकुंद चौधरी, प्रा. राम वाघमारे, रोटरी सिनियर्सचे कार्यकारी सचिव रविंद्र पाटील, प्रशांत ठोंबरे यांच्यासह अनेक मान्यवर उपस्थित होते.
शिबिर यशस्वी करण्यासाठी शंकरा आय हॉस्पिटलचे समन्वयक सत्यानंद, चालक इक्बालभाई तसेच प्रविण आय क्लिनिकचे व्यवस्थापक भगवान माळी, प्रल्हाद पाटील, अंकुश माळी, दिप्तेश वारुळे आणि इकबाल शेख यांनी विशेष परिश्रम घेतले.
