हातकणंगले (प्रतिनिधी)
हातकणंगले तालुक्यातील इचलकरंजी जवळील खोतवाडी गावातील एसटी सेवा काही महिन्यांपासून अनियमित असल्याने गावातील महिला, पुरुष, वृद्ध, बालके, शालेय व महाविद्यालयीन विद्यार्थी तसेच कामगार वर्गाला मोठ्या अडचणींचा सामना करावा लागत होता.
या समस्येबाबत ग्रामस्थांनी पुढाकार घेऊन निवेदन तयार करून जिल्हा परिषद सदस्या सानिका आवडे-यड्रावकर यांच्याकडे सादर केले होते व नियमित बससेवा सुरू करण्याची मागणी केली होती.
सानिका आवडे-यड्रावकर यांनी या समस्येची तात्काळ दखल घेत एसटी महामंडळाच्या संबंधित अधिकाऱ्यांशी भेट घेऊन खोतवाडी येथे नियमित बससेवा सुरू करणे तसेच बसथांबा पुन्हा सुरू करण्याची ठाम मागणी केली. यावेळी त्यांनी कोणत्याही परिस्थितीत तडजोड केली जाणार नाही, अशी भूमिका स्पष्टपणे मांडली.
त्यांच्या पाठपुराव्याला यश मिळत एसटी महामंडळाच्या अधिकाऱ्यांनी खोतवाडी येथे नियमित बससेवा सुरू ठेवण्याचे आश्वासन दिले आहे. ही सेवा गावातील सर्वसामान्य नागरिकांसाठी दिलासादायक ठरणार असून त्यांच्या दैनंदिन प्रवासातील अडचणी दूर होणार आहेत.
एसटी महामंडळाच्या अधिकाऱ्यांना निवेदन देताना सानिका आवडे-यड्रावकर यांच्यासह प्रमुख गावकरी उपस्थित होते.
