यवतमाळ (प्रतिनिधी)
उमरठा, मालखेड येथील राजाराम विद्यालयाचे मुख्याध्यापक विनायकराव खोब्रागडे यांची कन्या कु. सलोनी अर्चना विनायक खोब्रागडे हिने वैद्यकीय क्षेत्रातील MBBS परीक्षा यशस्वीरीत्या उत्तीर्ण करून घवघवीत यश संपादन केले आहे.
सलोनीच्या या यशामुळे उमरठा गावाच्या शिरपेचात मानाचा तुरा खोवला गेला आहे. गावाच्या इतिहासात पहिल्यांदाच एक मुलगी डॉक्टर झाली असून, ती गावातील पहिली वैद्यकीय पदवीधर ठरली आहे. तिच्या पाच वर्षांच्या अथक परिश्रम, जिद्द आणि चिकाटीचे आज सार्थक झाले आहे.
महाराष्ट्र आरोग्य विज्ञान विद्यापीठ, नाशिक यांनी तिला गुणपत्रिका प्रदान केली असून, आता ती वैद्यकीय सेवेसाठी सज्ज झाली आहे. तिच्या पुढील वाटचालीसाठी सर्वत्र शुभेच्छांचा वर्षाव होत आहे.
शिक्षक असलेल्या वडिलांचे संस्कार आणि आईचे प्रोत्साहन यामुळे सलोनीने हे यश मिळवले असून तिच्या या कामगिरीचे गावासह परिसरात मोठे कौतुक होत आहे. सोशल मीडियावरही तिच्यावर अभिनंदनाचा वर्षाव सुरू आहे.
मुख्याध्यापक विनायकराव खोब्रागडे यांच्या कन्येने मिळवलेले हे यश ग्रामीण भागातील विद्यार्थिनींसाठी प्रेरणादायी ठरत आहे.
