शहादा तालुक्यात १६५३ ज्येष्ठ नागरिकांना ‘मुख्यमंत्री वयोश्री योजने’चा लाभ

शहादा | प्रतिनिधी

महाराष्ट्र शासनाच्या ‘मुख्यमंत्री वयोश्री योजना’ अंतर्गत ६५ वर्षे व त्यावरील ज्येष्ठ नागरिकांना आणि दिव्यांग लाभार्थ्यांना सहाय्यक साधने तसेच आर्थिक मदत देण्याचा उपक्रम राबविण्यात आला. या योजनेअंतर्गत पात्र लाभार्थ्यांच्या बँक खात्यात थेट (DBT) स्वरूपात ₹३,००० इतके एकरकमी अर्थसहाय्य जमा केले जाते.

या योजनेचा मुख्य उद्देश ज्येष्ठ नागरिकांना वयोमानानुसार येणाऱ्या अडचणी, आजारपण आणि अशक्तपणामध्ये आवश्यक साधने उपलब्ध करून देणे तसेच त्यांचे दैनंदिन जीवन अधिक सुलभ करणे हा आहे.

या पार्श्वभूमीवर शहादा तालुक्यातील एकूण १,६५३ ज्येष्ठ नागरिक आणि दिव्यांग लाभार्थ्यांना सहाय्यक साधने व उपकरणांचे वाटप करण्यात आले. हा कार्यक्रम शहादा येथील संत सेना नाभिक समाज मंगल कार्यालयात पार पडला.

या प्रसंगी खासदार गोवाल पाडवी आणि आमदार राजेश पाडवी यांच्या हस्ते लाभार्थ्यांना उपकरणांचे वितरण करण्यात आले. कार्यक्रमास जिल्ह्यातील भाजप पदाधिकारी तसेच ‘वयोश्री योजने’शी संबंधित मान्यवर उपस्थित होते.

यावेळी मान्यवरांनी या योजनेमुळे ज्येष्ठ नागरिकांना मोठा दिलासा मिळत असल्याचे नमूद करत शासनाच्या कल्याणकारी उपक्रमांचे कौतुक केले.