दिघोळ माळेवाडी | प्रतिनिधी
दिघोळ माळेवाडी ग्रुप ग्रामपंचायतीच्या आगामी निवडणुकीसाठी वार्डनिहाय आरक्षण सोडत आज जाहीर करण्यात आली. ही सोडत शंकरराव गायकवाड (विस्तार अधिकारी, पंचायत समिती जामखेड) यांच्या उपस्थितीत पार पडली.
या निवडणुकीत एकूण 4 वार्डमधून 11 सदस्य पदांसाठी मतदान होणार असून, आरक्षण जाहीर होताच गावातील राजकीय वातावरण तापले आहे. इच्छुक उमेदवारांनी आतापासूनच मतदार संपर्क आणि प्रचार मोहीम सुरू केली आहे.
सरपंच पदासाठी थेट जनतेतून निवड
यंदा सरपंच पद हे अनुसूचित जाती (एससी) महिला प्रवर्गासाठी राखीव असून सरपंचाची निवड थेट जनतेतून होणार आहे. त्यामुळे या पदासाठी मोठी चुरस निर्माण झाली असून अनेक इच्छुकांनी तयारी सुरू केली आहे.
वार्डनिहाय आरक्षण
वार्ड क्रमांक 1: सर्वसाधारण महिला, सर्वसाधारण पुरुष, सर्वसाधारण पुरुष
वार्ड क्रमांक 2: नागरिकांचा मागास प्रवर्ग पुरुष, सर्वसाधारण महिला, सर्वसाधारण महिला
वार्ड क्रमांक 3: अनुसूचित जाती महिला, सर्वसाधारण महिला, सर्वसाधारण पुरुष
वार्ड क्रमांक 4: नागरिकांचा मागास प्रवर्ग महिला, सर्वसाधारण पुरुष
गावातील पाणीपुरवठा, रस्ते, स्वच्छता आणि मूलभूत विकासकामे हे प्रमुख मुद्दे या निवडणुकीत केंद्रस्थानी राहणार आहेत. तर दुसरीकडे गट-तट आणि स्थानिक राजकारणालाही रंग चढण्याची शक्यता व्यक्त केली जात आहे.
ग्रामस्थांनी मात्र विकासाभिमुख निवडणूक होऊन सक्षम नेतृत्व निवडले जावे, अशी अपेक्षा व्यक्त केली आहे.
या प्रसंगी ग्रामसेवक रफिक तांबोळी, तलाठी धोंडीराम राठोड, पोलीस पाटील राजेंद्र गीते, सरपंच संतोष शिंदे, माजी सरपंच पिराजी दगडे, नानासाहेब गीते, उपसरपंच दशरथ राजगुरू यांच्यासह अनेक ग्रामस्थ उपस्थित होते.
