मळद | प्रतिनिधी | दि. 10 जून 2026
खडकी (ता. दौंड) येथील ब्राईट फ्युचर इंग्लिश मीडियम स्कूल अँड ज्युनिअर कॉलेजच्या विद्यार्थ्यांनी राज्यस्तरीय ‘उत्तुंगतेज बालवैज्ञानिक स्पर्धा परीक्षा’मध्ये उल्लेखनीय यश संपादन करत शाळेच्या शिरपेचात मानाचा तुरा खोवला आहे. या स्पर्धेतील उत्कृष्ट कामगिरीमुळे शाळेच्या तीन विद्यार्थ्यांची भारतीय अंतराळ संशोधन संस्था (ISRO) आणि भारतीय तंत्रज्ञान संस्था (IIT) येथे आयोजित शैक्षणिक अभ्यास दौऱ्यासाठी निवड झाली आहे.
या स्पर्धेत इयत्ता सहावी, नववी आणि दहावीतील विद्यार्थ्यांनी सहभाग घेतला होता. त्यापैकी सहा विद्यार्थ्यांची मुलाखतीसाठी निवड झाली. अंतिम राज्य गुणवत्ता यादीत इयत्ता नववीतील काळे रिद्धी सचिन हिने राज्यात 12वा क्रमांक, तर इयत्ता सहावीतील खोमणे धीरज गणेश याने 7वा आणि शितोळे साईराज मनोज याने 8वा क्रमांक पटकावत विशेष यश मिळवले.
या यशाच्या बळावर तिन्ही विद्यार्थ्यांना ISRO आणि IIT येथे शैक्षणिक अभ्यास दौऱ्यात सहभागी होण्याची संधी मिळाली आहे. या दौऱ्यादरम्यान विद्यार्थ्यांना विज्ञान, तंत्रज्ञान, संशोधन आणि अंतराळ विज्ञान क्षेत्रातील अत्याधुनिक घडामोडींची प्रत्यक्ष माहिती मिळणार आहे.
विद्यार्थ्यांच्या या यशामागे शिक्षक तेजस गायकवाड आणि प्रशांत चव्हाण यांचे मोलाचे मार्गदर्शन लाभले. विद्यार्थ्यांच्या या उल्लेखनीय यशाबद्दल संस्थेचे अध्यक्ष राजू गायकवाड, संचालिका रोहिणी गायकवाड, खजिनदार तुषार काळे, सचिव ऋषिकेश गायकवाड, उपाध्यक्ष तेजस गायकवाड, मुख्याध्यापिका शीतल काळभोर, उपमुख्याध्यापक योगेश हगारे तसेच सर्व शिक्षक व शिक्षकेतर कर्मचाऱ्यांनी विद्यार्थ्यांचे अभिनंदन करून त्यांच्या पुढील वाटचालीस शुभेच्छा दिल्या.
