वाळुंजनगर, प्रतिनिधी :
आंबेगाव तालुक्यातील वाळुंजनगर येथील शेतकरी कुटुंबातील कु. आकांक्षा ज्ञानेश्वर वाळुंज यांनी एमबीबीएस (MBBS) वैद्यकीय पदवी परीक्षेत प्रथम श्रेणीत उत्तीर्ण होत उल्लेखनीय यश संपादन केले आहे. त्यांच्या या यशामुळे वाळुंजनगरसह संपूर्ण परिसरात आनंदाचे वातावरण निर्माण झाले आहे.
ग्रामीण भागातील विद्यार्थिनी असूनही कठोर परिश्रम, जिद्द आणि चिकाटीच्या बळावर आकांक्षा यांनी वैद्यकीय शिक्षणाचे स्वप्न साकार केले. त्यांच्या या यशामुळे गावातील विद्यार्थ्यांसमोर एक प्रेरणादायी आदर्श निर्माण झाला असून शिक्षण क्षेत्रातही गावाची मान उंचावली आहे.
या यशामागे त्यांचे आई-वडील, कुटुंबीय तसेच शिक्षकांचे मोलाचे मार्गदर्शन आणि सहकार्य लाभले. आकांक्षा यांच्या यशाबद्दल विविध क्षेत्रातील मान्यवर, ग्रामस्थ, मित्रपरिवार आणि नातेवाईकांकडून त्यांच्यावर अभिनंदनाचा वर्षाव होत आहे.
कु. आकांक्षा वाळुंज यांना पुढील शैक्षणिक व व्यावसायिक वाटचालीसाठी मनःपूर्वक शुभेच्छा देण्यात येत असून, त्यांच्या हातून समाजसेवा व रुग्णसेवेचे मोठे कार्य घडावे, अशी अपेक्षा व्यक्त केली जात आहे.
