लोणी, प्रतिनिधी :
मैत्री ही केवळ सुख-दुःखात साथ देण्यापुरती मर्यादित नसून, मित्राच्या पश्चात त्याच्या कुटुंबालाही आधार देण्याची भावना आंबेगाव तालुक्यातील रानमळा ग्रामस्थांनी कृतीतून दाखवून दिली आहे.
रानमळा येथील ३८ वर्षीय शेतकरी संतोष दीपक सिनलकर यांच्या अकाली निधनानंतर अवघ्या सहा दिवसांत मित्रमंडळी, ग्रामस्थ, सामाजिक संस्था व विविध संघटनांनी एकत्र येत त्यांच्या कुटुंबासाठी सुमारे सव्वाचार लाख रुपयांचा मदतनिधी उभारला.
संतोष सिनलकर हे शेती व्यवसायातून आपल्या कुटुंबाचा उदरनिर्वाह करत होते. त्यांच्या पश्चात आई, पत्नी आणि दोन लहान मुले असा परिवार आहे. मंगळवार (दि. २) रोजी हृदयविकाराच्या झटक्याने त्यांचे अचानक निधन झाल्याने कुटुंबावर दुःखाचा डोंगर कोसळला.
घरातील कर्त्या व्यक्तीचे निधन झाल्यानंतर कुटुंबाला आर्थिक व मानसिक आधाराची गरज ओळखून सरपंच राजू सिनलकर, दीपक वाळुंज, कमलेश सिनलकर, प्रकाश गायकवाड, शंकर सिनलकर, जगन्नाथ लंके यांच्यासह मित्रमंडळी व ग्रामस्थ पुढे सरसावले. सोशल मीडियाच्या माध्यमातून मदतीचे आवाहन करण्यात आले आणि नागरिकांनी त्याला उत्स्फूर्त प्रतिसाद दिला.
केवळ २०० रुपयांपासून ते ५० हजार रुपयांपर्यंत विविध स्वरूपात मदत जमा झाली. शिवसेना नेते रमेश येवले यांनी ५० हजार रुपयांची मदत केली. तसेच गिरवली येथील श्रीराम गुरुकुलचे विकास महाराज हगवणे यांनी संतोष सिनलकर यांच्या एका मुलाच्या शिक्षणासाठी पुढील तीन वर्षे दरवर्षी २५ हजार रुपये देण्याची घोषणा केली.
इयत्ता दहावी बॅच २००४-०५, हेमंत पडवळ, लोणी-धामणी भाजपा परिवार तसेच विविध मान्यवर व सामाजिक कार्यकर्त्यांनीही आर्थिक सहकार्य केले. सुमारे २५० हून अधिक दानशूर व्यक्तींच्या सहभागातून सव्वाचार लाख रुपयांचा निधी उभा राहिला.
दशक्रिया विधीच्या दिवशी जिल्हा परिषदेचे उपाध्यक्ष विवेक वळसे पाटील, माजी उपाध्यक्ष अरुण गिरे तसेच परिसरातील विविध गावांचे लोकप्रतिनिधी, सामाजिक संस्थांचे पदाधिकारी व ग्रामस्थ यांच्या उपस्थितीत ही रक्कम दिवंगत संतोष सिनलकर यांच्या मुलांच्या नावाने बँकेत मुदत ठेव स्वरूपात जमा करण्याचा निर्णय घेण्यात आला.
संकटाच्या काळात समाज एकत्र येऊन कुटुंबाला आधार देऊ शकतो, याचे प्रेरणादायी उदाहरण रानमळा ग्रामस्थांनी घालून दिले आहे. या माणुसकीच्या कार्याचे परिसरात सर्वत्र कौतुक होत असून मैत्री, सामाजिक बांधिलकी आणि सहकार्याचा आदर्श म्हणून या उपक्रमाकडे पाहिले जात आहे.
