भिवंडी, दि. १० जून २०२६ : भिवंडी शहरातील नूर मस्जिद, नागाव रोड परिसरात स्वतःला अन्न व औषध प्रशासन (FDA) विभागाचे अधिकारी असल्याचे भासवत एका दुकानातून पैसे उकळण्याचा प्रयत्न झाल्याची धक्कादायक घटना उघडकीस आली आहे.
मिळालेल्या माहितीनुसार, संबंधित महिलेने एका दुकानात जाऊन स्वतःची ओळख FDA विभागाच्या अधिकारी म्हणून करून दिली. त्यानंतर दुकानातील मालाची तपासणी करण्याचे नाटक करत विविध नियमांचे उल्लंघन झाल्याचे सांगून दुकान मालकाला कारवाईची भीती दाखवली. तसेच कारवाई टाळण्यासाठी तब्बल दोन लाख रुपयांची मागणी केल्याचे सांगण्यात येत आहे.
मात्र, दुकान मालकाला संशय आल्याने त्यांनी संबंधित महिलेचे अधिकृत ओळखपत्र तसेच कारवाईसंदर्भातील लेखी आदेश दाखविण्याची मागणी केली. यावेळी विचारलेल्या प्रश्नांची समाधानकारक उत्तरे देता न आल्याने तिची पोलखोल झाली.
दरम्यान, परिसरातील नागरिक आणि व्यापारी मोठ्या संख्येने जमा झाल्याने संबंधित महिलेचा पैसे उकळण्याचा डाव फसला. त्यानंतर स्थानिक नागरिकांनी तात्काळ शांतीनगर पोलीस ठाणे येथे दूरध्वनीद्वारे माहिती दिली. पोलिसांनी घटनास्थळी पोहोचून संबंधित महिलेला ताब्यात घेतले.
पुढील चौकशीनंतर संबंधित महिलेविरुद्ध खंडणी उकळण्याचा प्रयत्न केल्याप्रकरणी गुन्हा दाखल करण्यात आला असून पोलीस अधिक तपास करीत आहेत.
या घटनेमुळे व्यापारी वर्गात खळबळ उडाली असून कोणतीही शासकीय कारवाई असल्याचा दावा करणाऱ्या व्यक्तीची ओळख व कागदपत्रे तपासूनच सहकार्य करावे, असे आवाहन नागरिकांकडून करण्यात येत आहे.
