शिरूर | प्रतिनिधी
जागतिक नेत्रदान दिनाचे औचित्य साधून श्री छत्रपती संभाजी शिक्षण संस्था संचलित सिताबाई थिटे कॉलेज ऑफ फार्मसी (डी. फार्म.) राष्ट्रीय सेवा योजना युनिट आणि आनंद ऋषीजी नेत्रालय व्हिजन सेंटर यांच्या संयुक्त विद्यमाने महाविद्यालयात मोफत नेत्र तपासणी शिबिराचे आयोजन करण्यात आले. या शिबिराला विद्यार्थी, शिक्षक, पालक आणि नागरिकांचा उत्स्फूर्त प्रतिसाद लाभला.
शिबिरामध्ये नेत्र तपासणी, मोतीबिंदू तपासणी, चष्म्याचा नंबर तपासणी तसेच विविध नेत्रविकारांचे निदान करून तज्ज्ञांकडून योग्य वैद्यकीय सल्ला देण्यात आला. तपासणीदरम्यान मोतीबिंदूचे निदान झालेल्या रुग्णांना आनंद ऋषीजी हॉस्पिटल येथे अल्पदरात मोतीबिंदू शस्त्रक्रिया करून घेण्याचा सल्ला देण्यात आला.
यावेळी नेत्रतज्ज्ञ डॉ. रोहित स्वामी आणि संदीप पाडोळे यांनी नेत्रदानाचे महत्त्व, त्यासंदर्भातील समज-गैरसमज तसेच दृष्टीहीन व्यक्तींना नवजीवन देण्यासाठी नेत्रदानाची आवश्यकता याविषयी सविस्तर मार्गदर्शन केले. समाजामध्ये नेत्रदानाबाबत सकारात्मक जनजागृती निर्माण होणे ही काळाची गरज असल्याचे त्यांनी सांगितले.
या शिबिरात डी. फार्मसी, बी. फार्मसी, नर्सिंग महाविद्यालय तसेच विजयामाला स्कूल व ज्युनिअर कॉलेजचे विद्यार्थी, शिक्षक, शिक्षकेतर कर्मचारी, पालक आणि नागरिक अशा एकूण १९७ जणांनी सहभाग नोंदवून लाभ घेतला.
संस्थेचे अध्यक्ष डॉ. राजेंद्र थिटे यांनी ग्रामीण भागात आरोग्यसेवा पोहोचविण्यासाठी तसेच विविध समाजोपयोगी उपक्रम राबविण्यासाठी संस्था सातत्याने कार्यरत असल्याचे सांगितले. त्यांनी नेत्र तपासणीचे महत्त्व अधोरेखित करत प्रत्येकाने मरणोत्तर नेत्रदानाचा संकल्प करावा, असे आवाहन केले.
या उपक्रमाच्या यशस्वी आयोजनासाठी महाविद्यालयाचे प्राचार्य डॉ. अमोल शहा, राष्ट्रीय सेवा योजना कार्यक्रम समन्वयक प्रा. विशाल कारखिले, प्रा. निखिल केदारी, प्रा. निशा केसकर, राष्ट्रीय सेवा योजना स्वयंसेवक तसेच शिक्षकेतर कर्मचाऱ्यांनी मोलाचे सहकार्य केले.
“नेत्रदान हेच श्रेष्ठ दान, अंधत्वमुक्त भारताचे अभियान” हा समाजप्रबोधनाचा संदेश देत शिबिराची सांगता करण्यात आली.
