महाबळेश्वर | प्रतिनिधी
महाबळेश्वर येथील पर्यावरण संवेदनशील क्षेत्रात असलेल्या हेरिटेज ग्रेड-१ दर्जाच्या गोल्फ कोर्स परिसरात कथित पर्यावरणीय हानी आणि नियमबाह्य कामांप्रकरणी संबंधित शासकीय अधिकारी व कर्मचाऱ्यांवरही कर्तव्यात कसूर केल्याबद्दल निलंबनाची कारवाई करण्यात यावी, अशी मागणी पर्यावरणप्रेमी आणि स्थानिक नागरिकांकडून करण्यात आली आहे.
मिळालेल्या माहितीनुसार, महाबळेश्वर नगरपालिकेच्या हद्दीतील सिटी सर्व्हे क्रमांक ११७ व ११८ मधील गोल्फ कोर्स परिसरात गवत लागवडीसाठी परवानगी घेण्यात आली होती. मात्र, या परवानगीचा गैरवापर करून मोठ्या प्रमाणात उत्खनन, जमीन सपाटीकरण, पत्र्याचे शेड उभारणे, कुंपण बांधणे तसेच वृक्षतोड करण्यात आल्याचा आरोप करण्यात आला आहे.
तसेच, झाडांच्या फांद्या आणि बुंधे जमिनीत गाडून पुरावे नष्ट करण्याचा प्रयत्न झाल्याचाही दावा करण्यात आला आहे. या कथित प्रकारामुळे पर्यावरणीय नियम तसेच हेरिटेज संरक्षणाच्या निकषांचे उल्लंघन झाल्याची चर्चा परिसरात सुरू आहे.
पर्यावरणप्रेमींच्या म्हणण्यानुसार, महाबळेश्वर नगरपालिकेचे वृक्ष अधिकारी कल्याण हिवरे, महसूल विभागाचे तलाठी सागर शिंदे तसेच संबंधित बांधकाम विभाग आणि प्रशासनाने वेळेत हस्तक्षेप करून कारवाई का केली नाही, याबाबत प्रश्न उपस्थित होत आहेत.
गोल्फ कोर्स परिसरातील कथित नियमबाह्य कामे नगरपालिकेच्या आणि तहसील कार्यालयाच्या जवळच सुरू असताना संबंधित यंत्रणांनी दुर्लक्ष केल्याचा आरोप करण्यात येत आहे. त्यामुळे या प्रकरणात केवळ संबंधित प्रकल्प व्यवस्थापन नव्हे, तर कर्तव्यात कसूर केल्याचा ठपका प्रशासनावरही ठेवण्यात येत आहे.
यासंदर्भात जिल्हाधिकारी जिल्हाधिकारी सातारा, उपविभागीय अधिकारी कार्यालय, वाई तसेच उच्चस्तरीय पर्यावरण समितीने या प्रकरणाची सखोल चौकशी करून दोषींवर शिस्तभंग व निलंबनाची कारवाई करावी, अशी मागणी करण्यात आली आहे.
दरम्यान, या सर्व आरोपांबाबत संबंधित महसूल प्रशासन, महाबळेश्वर नगरपालिका किंवा इतर संबंधित विभागांची अधिकृत भूमिका अद्याप समोर आलेली नाही. त्यामुळे चौकशीअंती वस्तुस्थिती स्पष्ट होणार असून या प्रकरणाकडे पर्यावरणप्रेमी आणि नागरिकांचे लक्ष लागले आहे.
