उदगीर | प्रतिनिधी :
उदगीर-अहमदपूर मार्गावरील सुकणी गावाजवळ आज दुपारी सुमारे १२ वाजण्याच्या सुमारास महाराष्ट्र राज्य मार्ग परिवहन महामंडळाची (एसटी) बस पलटी होऊन अपघात झाल्याची घटना घडली. या अपघातात काही प्रवासी जखमी झाले असून त्यांना तातडीने उपचारासाठी रुग्णालयात दाखल करण्यात आले.
मिळालेल्या माहितीनुसार, उदगीरहून अहमदपूरकडे जाणारी एसटी बस सुकणी गावालगतच्या पुलाजवळून जात असताना चालकाचा वाहनावरील ताबा सुटल्याने बस रस्त्याच्या कडेला असलेल्या नाल्यात पलटी झाली.
अपघाताची माहिती मिळताच सुकणी गावातील युवकांनी तत्काळ घटनास्थळी धाव घेतली. बसमध्ये अडकलेल्या प्रवाशांना बाहेर काढण्यासाठी त्यांनी बसच्या काचा फोडून बचावकार्य केले. जखमी प्रवाशांना तातडीने बाहेर काढून उपचारासाठी उदगीर येथील शासकीय रुग्णालयात पाठविण्यात आले.
स्थानिक नागरिकांच्या मते, संबंधित ठिकाणी पुलाचे काम सुरू असल्याने रस्ता अरुंद झाला आहे. त्यामुळे वाहतुकीत अडचणी निर्माण होत असून अशा प्रकारच्या अपघातांचा धोका वाढला आहे. याच कारणामुळे हा अपघात घडल्याची शक्यता व्यक्त केली जात आहे.
ग्रामस्थांनी प्रशासनाकडे येणाऱ्या आणि जाणाऱ्या वाहनांसाठी स्वतंत्र मार्गाची व्यवस्था करण्याची मागणी केली आहे. तसेच पुलाच्या कामादरम्यान योग्य वाहतूक नियोजन आणि सुरक्षेच्या उपाययोजना राबविण्याची आवश्यकता असल्याचेही नागरिकांनी सांगितले.
या अपघातामुळे काही काळ वाहतुकीची कोंडी निर्माण झाली होती. घटनेची माहिती मिळाल्यानंतर संबंधित यंत्रणांनी घटनास्थळी धाव घेऊन परिस्थिती नियंत्रणात आणली. अपघाताचे नेमके कारण आणि जखमींची संख्या याबाबत अधिकृत माहिती अद्याप प्राप्त झालेली नाही.
