सोलापूर | प्रतिनिधी
महाराष्ट्र लोकसेवा आयोगाच्या (MPSC) गट ‘ब’ संयुक्त पूर्व परीक्षा २०२६ साठी राज्यभरातून तब्बल ४ लाखांहून अधिक उमेदवार परीक्षा देणार असून, केवळ ५५२ पदांसाठी ही मोठी स्पर्धा रंगणार आहे. ही परीक्षा रविवार, १४ जून २०२६ रोजी राज्यातील ३७ जिल्हा केंद्रांवर आयोजित करण्यात आली आहे.
या भरती प्रक्रियेद्वारे सहायक कक्ष अधिकारी (ASO), राज्य कर निरीक्षक (STI) आणि पोलीस उपनिरीक्षक (PSI) या पदांसह विविध गट ‘ब’ संवर्गातील एकूण ५५२ रिक्त जागा भरण्यात येणार आहेत.
पदनिहाय जागा
- सहायक कक्ष अधिकारी (ASO) – ०६ पदे
- राज्य कर निरीक्षक (STI) – २३६ पदे
- पोलीस उपनिरीक्षक (PSI) – ३१० पदे
एमपीएससीची ही भरती प्रक्रिया तीन टप्प्यांत पार पडणार आहे. त्यामध्ये संयुक्त पूर्व परीक्षा, मुख्य परीक्षा आणि शारीरिक चाचणीचा समावेश आहे.
सोलापूर जिल्ह्यातून १३ हजारांहून अधिक उमेदवार
सोलापूर जिल्ह्यातून यंदा १३ हजारांपेक्षा अधिक उमेदवार परीक्षा देणार आहेत. सोलापूर शहरात जवळपास ३९ परीक्षा केंद्रांवर ही परीक्षा आयोजित करण्यात आली आहे.
उमेदवारांसाठी महत्त्वाच्या सूचना
परीक्षेला उपस्थित राहताना उमेदवारांनी वैध मूळ ओळखपत्र सोबत ठेवणे आवश्यक आहे. त्यामध्ये:
- आधार कार्ड
- पॅन कार्ड
- मतदार ओळखपत्र
यापैकी कोणतेही एक मूळ ओळखपत्र व त्याची छायांकित प्रत सोबत असणे बंधनकारक आहे.
पदवाढ आणि वयोमर्यादा शिथिलतेची मागणी
स्पर्धा परीक्षा विद्यार्थी संघटनेचे राज्य उपाध्यक्ष प्रशांत शिरगुर यांनी या भरतीतील जागा अपुऱ्या असल्याचे सांगत पदसंख्या वाढविण्याची मागणी केली आहे.
त्यांच्या मते, आरक्षणानुसार उपलब्ध जागा कमी असून अनेक उमेदवारांना न्याय मिळण्यासाठी पदवाढ आवश्यक आहे. तसेच वयोमर्यादेत सवलत देण्याची मागणीही त्यांनी केली आहे. परीक्षा प्रक्रियेत पारदर्शकता राखून राज्यसेवा पूर्व परीक्षेप्रमाणे उत्तरसूची लवकर प्रसिद्ध करावी, अशी अपेक्षाही त्यांनी व्यक्त केली.
राज्यातील लाखो स्पर्धा परीक्षा उमेदवारांचे लक्ष आता १४ जून रोजी होणाऱ्या या महत्त्वाच्या परीक्षेकडे लागले असून, कमी पदसंख्येमुळे स्पर्धा अधिक तीव्र होणार असल्याचे चित्र दिसून येत आहे.
