दोडामार्ग | प्रतिनिधी
सावंतवाडीच्या नगराध्यक्षा Shraddha Bhosale आणि त्यांच्या कुटुंबातील एका सदस्याकडून ठेकेदारांना थेट फोनवर धमक्या दिल्या जात असून, त्यांच्याकडून मोठ्या प्रमाणावर ‘टक्केवारी’ उकळली जात असल्याचा गंभीर आरोप जिल्हा परिषद सदस्य Michael D’Souza यांनी केला आहे. यासंदर्भातील भक्कम पुरावे आपल्याकडे असून, वेळ पडल्यास सर्व प्रकाराची जाहीर भांडाफोड करू, असा इशाराही त्यांनी दिला.
दोडामार्ग येथे आयोजित पत्रकार परिषदेत बोलताना डिसोझा यांनी सांगितले की, त्यांच्या कंपनीच्या माध्यमातून सावंतवाडीसह जिल्ह्यातील १५० हून अधिक युवकांना रोजगार उपलब्ध करून देण्यात आला आहे. भविष्यात हा आकडा एक हजारांपर्यंत नेण्याचे उद्दिष्ट असून, यासाठी कार्यालयीन जागेची आवश्यकता होती. त्यानुसार ‘बाळासाहेब ठाकरे प्रबोधिनी’ येथील जागा भाड्याने देण्याबाबत सुरुवातीला सकारात्मक भूमिका घेण्यात आली होती.
मात्र, नगराध्यक्ष झाल्यानंतर श्रद्धा भोसले यांनी या जागेसाठी अवाजवी भाड्याची मागणी केल्याचा आरोप डिसोझा यांनी केला. अखेरीस २२० चौरस फूट जागेसाठी ५९ हजार रुपये भाडे आकारण्यात आल्याचे त्यांनी सांगितले.
कार्यालयाला टाळे ठोकण्याचा प्रयत्न?
डिसोझा यांच्या म्हणण्यानुसार, नगराध्यक्षा अलीकडेच कार्यालयाच्या पाहणीसाठी आल्या असता, येथील स्वच्छतागृह कोण वापरते याबाबत प्रश्न उपस्थित करून कर्मचाऱ्यांना कार्यालयाला टाळे ठोकण्याचे निर्देश दिले. यामुळे येथे कार्यरत असलेल्या सुमारे ६० युवक-युवतींच्या रोजगारावर परिणाम होण्याची शक्यता असल्याने त्यांनी या निर्णयाला विरोध केल्याचे सांगितले.
ठेकेदारांना धमक्या दिल्याचा आरोप
पत्रकार परिषदेत डिसोझा यांनी आणखी गंभीर आरोप करताना सांगितले की, शहरात सुरू असलेल्या गॅस पाइपलाइन आणि नळपाणी योजनेच्या कामांमध्ये ठेकेदारांकडून मोठ्या प्रमाणात टक्केवारी घेतली जात आहे. काही ठेकेदारांना थेट फोन करून दबाव टाकण्यात येत असल्याचा दावा त्यांनी केला. यासंदर्भातील ऑडिओ क्लिप आणि इतर पुरावे योग्य वेळी सार्वजनिक केले जातील, असेही त्यांनी स्पष्ट केले.
मल्टीस्पेशालिटी हॉस्पिटल रखडल्याचा आरोप
सावंतवाडीत प्रस्तावित मल्टीस्पेशालिटी हॉस्पिटल प्रकल्प नगराध्यक्षांच्या भूमिकेमुळे रखडल्याचा आरोपही डिसोझा यांनी केला. जागेच्या मूल्यवाढीच्या अपेक्षेमुळे प्रकल्पाला विरोध होत असल्याचा दावा त्यांनी केला असून, यामुळे नागरिकांना दर्जेदार आरोग्यसेवेपासून वंचित राहावे लागत असल्याचे म्हटले.
दरम्यान, मायकल डिसोझा यांनी केलेल्या आरोपांबाबत नगराध्यक्षा श्रद्धा भोसले किंवा सावंतवाडी नगरपरिषदेची अधिकृत प्रतिक्रिया अद्याप समोर आलेली नाही. त्यामुळे या आरोपांवर संबंधितांकडून काय स्पष्टीकरण दिले जाते, याकडे नागरिकांचे लक्ष लागले आहे.
(टीप : वरील सर्व आरोप मायकल डिसोझा यांनी पत्रकार परिषदेत केलेले असून, संबंधित यंत्रणेकडून किंवा नगराध्यक्षांकडून त्यांची अधिकृत पुष्टी झालेली नाही.)
